Ekstradohet nga Gjermania "drejtori i bankës" që përvetësoi 230 mijë euro

TIRANE - Interpol Tirana ka ekstraduar dje dy shtetas shqiptarë të kërkuar nga drejtësia për veprat penale të mashtrimit dhe trafikimit të të miturve për t'i shfrytëzuar për prostitucion. Njëri është ekstraduar nga Gjermania, i dënuar në mungesë me 7 vjet heqje lirie, ndërsa tjetri nga Italia, për të cilin Gjykata e Krimeve të Rënda ka vendosur masën "Arrest me burg". Burime zyrtare të Policisë thanë dje se nga Specialistët e Interpol Tiranës, u bë ekstradimi nga Gjermania drejt Shqipërisë, i shtetasit shqiptar Ilir Demolli, 54 vjeç. Ky shtetas është arrestuar nga autoritetet policore në Mynih, më datë 05.03.2019, me qëllim ekstradimin drejt Shqipërisë, në zbatim të urdhërarrestit ndërkombëtar të nxjerrë nga Zyra Qendrore Kombëtare Interpol Tirana, pasi Gjykata e Rrethit Gjyqësor Tiranë e ka dënuar këtë shtetas me 7 vjet burg, për veprën penale "Mashtrimi". Sipas të njëjtave burime, ky shtetas, në vitin 2012, i kishte marrë me anë të mashtrimit shtetases F. SH., një shumë prej 230 mijë eurosh, duke iu prezantuar si drejtor i një banke private. Nga kjo shumë, Ilir Demolli i ka kthyer të dëmtuarës vetëm shumën prej 25 mijë eurosh. Po nga specialistët e Interpol Tiranë u bë ekstradimi nga Roma e Italisë, i shtetasit shqiptar M. H., 27 vjeç. Shtetasi M. H. ishte shpallur në kërkim ndërkombëtar nga Zyra Qendrore Kombëtare Interpol Tirana, pasi Gjykata e Shkallës së Parë për Krimet e Rënda Tiranë, ka caktuar masën e sigurisë "Arrest në burg", për veprën penale "Trafikimi i të miturve". Shtetasi M. H. ka trafikuar dhe shfrytëzuar për prostitucion, në Itali, në periudhën 2012- 2013, një shtetase, e cila në atë kohë ishte minorene. Si rezultat i bashkëpunimit të Interpol Tirana me Interpol Roma u bë i mundur arrestimi i tij në Itali, duke u finalizuar me ekstradimin drejt vendit tonë.