PS rrëzon Presidentin për 280 milionë euro PPP dhe e thërret të dëshmojë, Meta: 13 tetori, e vetmja zgjidhje
DEBATI TEK EKONOMIA, PSE U SHTY AFATI I PPP DERI NE TETOR. KOMISIONI I PS PER SHKARKIMIN I KERKON DESHMINE. REAGIMI I PRESIDENTIT
Komisioni për Ekonominë dhe Financat rrëzoi dje 4 dekretet e para të Presidentit Ilir Meta. I pari që ka marrë votat kundër deputetëve të maxhorancës ka qenë dekreti “Për kthimin e ligjit” nr. 37/ 2019, “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”, miratuar me ligjin nr. 9967, datë 24.7.2008 dhe ndryshuar me ligjin nr. 3/ 2015".
Pro Metës votuan deputetët e rinj të opozitës. Kryetari i Komisionit të Ekonomisë dhe Financave, Arben Ahmetaj, është ndalur te pika e dytë e rendit të ditës, që ishte shqyrtimi i dekretit për ligjin e koncesioneve. Ish- ministri i Financave ka sqaruar amendamentin e tij, që ishte pikërisht edhe arsyeja e kthimit të këtij ligji. Sipas Ahmetajt, qëllimi që ligji për koncesionet dhe PPP- të të hynte në fuqi më 1 tetor ishte pasi në draftligjin fillestar thuhej se ligji hynte në fuqi në fillim të korrikut, ndërkohë që u miratua në fund të këtij muaji. “Ndryshimet në ketë ligj kanë konsistuar në limitimin e përdorimit të ofertës së pakërkuar nga ana e autoriteteve kontraktuale. Ka qenë një iniciativë e Kryeministrit Rama, e Ministrisë së Financave dhe e imja personalisht. Për kujtesën tuaj, ligji ka kaluar në kuvend në fund të korrikut. Për shkak se është futur në seancë shumë më vonë sesa e ka shqyrtuar komisioni, pra, ne e kemi shqyrtuar në shkurt dhe është futur në Parlament në korrik, data e hyrjes në fuqi ka qenë 1 korriku. Amendamenti im kërkonte që ligji të mos ketë fuqi prapavepruese, pra, nga data 1 korrik, por kemi vënë datën 1 tetor që përkonte me të gjithë procedurën, shqyrtimin nga Presidenti dhe botimi në Fletoren Zyrtare”, u shpreh Ahmetaj. Debati Por argumentet e dhëna nga kryetari i komisionit nuk ishin bindëse as për deputeten e re të opozitës, Edlira Hyseni. Sipas Hysenit, shtyrja e afatit ngre dyshime se qeveria ka në plan të kalojë të tjera oferta të pakërkuara ( koncesione) deri në muajin tetor. “Mbetet ende e diskutueshme dhe jo bindëse se përse një ligj kaq i rëndësishëm është lënë gjithë këtë kohë ku ka kaluar në komision në shkurt dhe në Parlament, ka kaluar në fund të korrikut. Me ligjin që u miratua, afati u bë në 1 tetor. Dilema lind, deri më 1 tetor, a ka kërkesa të reja për koncesione?!”, u shpreh deputetja Hyseni. Në këtë moment ka ndërhyrë kryetari i komisionit dhe i ka kujtuar asaj se po ngatërron objektin e diskutimit. “Po flasim për ligjin e koncesioneve. Nuk mund të lejoj që të flasim për ç’të duam. Do zbatojmë procedurën parlamentare”, u shpreh Ahmetaj. Ndërkohë, vetëm me votat e deputetëve të maxhorancës janë rrëzuar edhe dy dekretet e tjera, ai ai për aksin rrugor MilotBalldren, dhe ai për koncesionin Orikum- Dukat.