Legalizimet, lista e dytë me familjet që marrin tapitë në 6 qarqe

Kadastra publikon emrat e 3 mijë familjeve që kanë gati lejen

Janë më shumë se 3 mijë familje që kanë gati lejen e legalizimit.

Gazeta vijon edhe sot me publikimin e listës së përfituesve në tetë qarqe të vendit, përkatësisht në Tiranë, Berat, Elbasan, Fier, Gjirokastër dhe Kukës. Familjet që kanë emrin në listë duhet të paraqiten pranë sporteleve të Agjencisë së Kadastrës për të tërhequr faturën për parcelën ndërtimore. Në momentin që shlyejnë detyrimin e truallit do të bëhet edhe pajisja e tyre me certifikatën e pronësisë. Për ata të cilët e shmangin këtë detyrim, regjistrimi do të bëhet me hipotekë ligjore. Kjo e fundit kufizon qytetarët që të kryejnë transaksione mbi këtë pronë. Në momentin që likuidohet fatura, hiqet edhe kufizimi.

FATURA

Të dhënat tregojnë se janë jo të pakta në numër familjet të cilat nuk janë paraqitur për të tërhequr lejen pavarësisht njoftimit për përfundim të procedurave nga ana e Kadastrës. Nga ana tjetër, ka edhe një numër të konsiderueshëm dosjesh për të cilat ka përfunduar procesi i legalizimit, por nuk është bërë regjistrimi. Të gjitha këto problematika dhe të tjera që lidhen me pronësinë, synohet të zgjidhen përmes ligjit të ri dhe krijimit të Agjencisë Shtetërore të Kadastrës, që prej disa muajsh ka nisur nga puna.

NDRYSHIMET

Në ndryshimet ligjore, përcaktohen procedurat e reja që do të ndiqen për regjistrimin e pronave dhe banesave. Qeveria synon që nëpërmjet reformës së ndërmarrë t'i japë zgjidhje vonesave të krijuara, veçanërisht nga zyrat e Hipotekës. Sipas ligjit të ri që pritet të miratohet brenda këtij viti, për regjistrimin e titujve të pronësisë do të ketë një afat 30- ditor. Përtej këtij harku kohor do të aplikohen kamatëvonesat deri në 300 mijë lekë. Zgjidhje është dhënë edhe për shqyrtimin e kërkesave. Për çdo kërkesë të depozituar, qytetarët do të marrin përgjigje brenda 15 ditëve. Një praktikë e tillë do të jetë detyrim ligjor për punonjësit.