Zeneli: Reforma Zgjedhore, jo me Damian Gjiknurin

Opozita parlamentare kërkon largimin e Damian Gjiknurit nga komisioni i Reformës Zgjedhore, ndërsa kryefjalë sipas tyre duhet të jetë ndryshimi i sistemit. Deputeti i opozitës së djathtë parlamentare, Alban Zeneli, tha se pa kryer një Reformë të thellë Zgjedhore, Parlamenti nuk ka bërë asgjë. Zeneli kërkoi që kjo reformë të jetë detyrim parësor, në sesionin ri politik, ndërsa renditi disa kushte në këmbim të votës pro, përfshirë ndryshimin e sistemit. “Largimi i menjëhershëm i Damian Gjiknurit nga bashkëkryesimi i komisionit parlamentar të Reformës Zgjedhore është detyrim parësor i të gjithë neve në këtë sesion parlamentar. Reforma Zgjedhore duhet të jetë kryefjala e të gjithë politikës shqiptare dhe e këtij Kuvendi, jo vetëm për fasadë, siç është përdorur e po përdoret edhe sot. Pa kryer një Reformë të vërtetë Zgjedhore, ne nuk kemi kryer asgjë. Një njeri i akuzuar dhe i dëgjuar si i përfshirë në krim elektoral nuk mund të mbajë pozicionin e bashkëkryetarit të Komisionit të Reformës Zgjedhore”, tha Zeneli. Ai i bëri thirrje deputetëve të opozitës që të mbështesin Reformën Zgjedhore. “Si deputet i Opozitës së Djathtë Parlamentare, ndiej thirrjen dhe detyrimin politik, institucional dhe ligjor që t’u bëj thirrje të gjithë kolegëve në Kuvendin e Shqipërisë, të gjithë faktorëve politikë parlamentarë dhe joparlamentarë, të gjithë miqve ndërkombëtarë të vendit tonë, që të gjithë së bashku, të punojmë me përgjegjësi të lartë për t’u dhënë qytetarëve shqiptarë zgjidhjet që ata meritojnë”, u shpreh Zeneli.