Raporti: 70 për qind e fëmijëve nga 8 deri në 18 vjeç janë dhunuar

Pothuajse 70 për qind e fëmijëve nga mosha 8 deri në 18 vjeç kanë pranuar se të paktën një herë përgjatë vitit të fundit kanë përjetuar dhunë fizike apo psikologjike. Sipas raportit të World Vision mbi "Situatën e Mirëqenies së Fëmijëve në Shqipëri', ky fenomen vazhdon ende të jetë prezent në shoqërinë shqiptare në shifra të larta. Po sipas këtij raporti, 46% e fëmijëve janë indiferentë dhe nuk duan të përfshihen në raportimin e rasteve të dhunës dhe 34% e tyre nuk e raportojnë, për shkak të mungesës së besimit që institucionet do ta zgjidhin situatën. "World Vision Albania, prej më shumë se 10 vitesh, punon ngushtë me fëmijët, komunitetet dhe institucionet shtetërore për identifikimin, raportimin dhe menaxhimin e rasteve të fëmijëve të dhunuar. Përkushtimi i institucioneve shtetërore, donatorëve, korporatave, organizatave të shoqërisë civile në ofrimin e shërbimeve të integruara vazhdon të jetë thelbësor për eliminimin e dhunës ndaj fëmijëve në Shqipëri. Në mbështetje të nevojës për shërbime, World Vision hartoi standardet dhe po piloton në Bashkitë Durrës dhe Dibër Shërbimin e Emergjencës për Fëmijët në rrezik të lartë", vë në dukje Artina Morava, drejtoresha e programit të World Vision për Shqipërinë dhe Kosovën. Dhuna është një prej faktorëve kryesorë që pengon zhvillimin dhe mirëqenien e fëmijëve si dhe cenon arritjen e rezultateve në ndërhyrjet socioekonomike, që çojnë në përmirësimin e cilësisë së jetës në Shqipëri. Mbi 350 fëmijë, të rinj, prindër, adoleshentë, personazhe të njohur publik, profesionistë të mbrojtjes së fëmijëve, por edhe përfaqësues të institucioneve publike dhe private bashkohen nën të njëjtin mesazh: "Duhet një botë e tërë për t'i dhënë fund dhunës ndaj fëmijëve!".