Pensionet, 5 dokumentet për rimbursimin e taksës
Procedura e detajuar që duhet të ndiqet në njësitë bashkiake për zerimin e taksës për banesën. Afat, deri më 30 shtator
TABELA E PLOTE/ Gjendja Civile sqaron procedurat dhe kategoritë e pensionistëve që përfitojnë nga përjashtimi i taksës së shtëpisë. Dokumentet që duhen dorëzuar në zyrat e njësive bashkiake dhe përfitimi për secilin. Pagesa që shmanget në të gjitha zonat sipas çmimit të shtëpisë
Vetëdeklarimi në zyrat e Ujësjellës Kanalizimeve në Tiranë është vetëm hapi i parë drejt përjashtimit nga taksa për pronën.
Kategoritë që përfitojnë rimbursim të saj, përfshirë pensionistët kryefamiljarë, duhet të ndjekin një procedurë të ngjashme edhe në zyrën e gjendjes civile. Gazeta është interesuar në një nga njësitë administrative mbi procedurën që duhet ndjekur, dokumentet dhe afatet për pjesën e dytë të aplikimit, përmes së cilës sigurohet se një person që trajtohet me pension pleqërie dhe nuk ka në ngarkim persona të punësuar, mund t'i shmanget taksës, që pritet të hyjë në fuqi vitin e ardhshëm. Ndryshe nga vetëdeklarimi në pikat e UKT, ata kanë kohë deri në fundin e këtij muaji për të mbledhur dokumentet e plota sipas tabelës bashkëngjitur shkrimit.
KUSHTET PËR PËRFITIMIN
Janë zyrat e financës në 24 njësitë administrative dhe tri lagjet e kryeqytetit, të cilat kanë tagrin për mbledhjen e dokumentacioneve të kategorive që duan të përfitojnë nga vendimi i bashkisë për t'u përjashtuar nga taksa për pronën. Që të përfitojë, një pensionist duhet të vërtetojë së pari që është i tillë, duke dorëzuar vërtetimin që trajtohet me pension pleqërie dhe bashkë me të dhe një certifikatë familjare, përmes së cilës vërtetohet që nuk ka në ngarkim persona të tjerë, të aftë për punë. Në këtë pikë duhet pasur kujdes, pasi në dokumentin e parë, sipas specialistes së financës, duhet të shënohet medoemos data e trajtimit me pension pleqërie të të interesuarit. "Nëse libreza ka të shënuar datën e fillimit të pensionit, nevojitet një fotokopje. Në rastin e kundërt, nevojitet vërtetimi i pensionit për kryefamiljarin dhe bashkëshorten, në rast se trajtohet edhe ajo me pension", sqaron specialistja e njësisë administrative në Tiranë. Kusht tjetër është rregullsia në pagesat e faturave të ujit. E vërtetuar kjo me faqen e parë të librezës që tregon se UKT ka lidhur marrëveshje me të dhe faqen e fundit që tregon shlyerjen e të gjitha detyrimeve deri në datën e aplikimit. Me mbledhjen e vetëdeklarimeve, Bashkia Tiranë ka lënë afat edhe 15 ditë të tjera për aplikimet në njësitë administrative për kategoritë që duan të shmangin taksën. Në fillim të muajit pasardhës, listat shkojnë në Drejtorinë e Përgjithshme të Taksave, e cila bën përpunimin e të dhënave dhe i nis në UKT për t'i futur në sistem me faturë zero.