PD: Prokuroria gënjeu për shenjat e gishtërinjve të Kajmakut
Partia Demokratike kërkoi shkarkimin e Agim Kajmakut, për shkak se ai ka tejkaluar afatin e dhënies së shenjave të gishtave brenda 3 ditëve. Në një dalje për mediat, sekretari i përgjithshëm i PD, Gazment Bardhi, tha se "Prokuroria gënjeu për shenjat e gishtërinjve të Agim Kajmakut, në mënyrë që të mbrojë nga shkarkimi kriminelin e Ramës në Bashkinë e Vorës. Sipas ligjit të dekriminalizimit, kush nuk jep shenjat e gishtërinjve 5 ditë nga marrja e njoftimit, humbet menjëherë mandatin dhe shkarkohet"." Çështja e Agim Kajmakut, i arrestuar në Greqi dhe akoma në kërkim në shtetin fqinj, ka demaskuar Prokuroren e Përgjithshme, Arta Marku, si një vegël e pushtetit kriminal të Edi Ramës. Arta Marku është kapur në flagrancë duke gënjyer shqiptarët dhe partnerët ndërkombëtarë për të mbrojtur kriminelin e Edi Ramës në Bashkinë e Vorës nga dhënia e gjurmëve të gishtërinjve. Në një rast të paprecedent, Posta Shqiptare e përgënjeshtroi Arta Markun, e cila deklaroi dje se nuk i ka marrë shenjat e gishtërinjve të Agim Kajmakut, për shkak të postierit që nuk i ka gjetur adresën. Kjo është një gënjeshtër që nuk mund ta besojë as një fëmijë, sepse adresa e Agim Kajmakut, edhe pse nuk është e shkruar në formularin e dekriminalizimit, është botërisht e njohur - Bashkia e Vorës, 15 kilometra larg zyrës së Arta Markut", tha Bardhi. Sipas tij, Prokuroria i ka dalë në mbrojtje Kajmakut, sepse në të kundërt ai do të humbte detyrën. "Ka një arsye pse Arta Marku është detyruar të gënjejë publikisht për të justifikuar mosdorëzimin e gjurmëve të gishtërinjve të Agim Kajmakut. Sipas ligjit të dekriminalizimit, personi që nuk jep shenjat e gishtërinjve 5 ditë nga marrja e njoftimit, humbet menjëherë mandatin dhe shkarkohet nga funksioni shtetëror. Agim Kajmaku është në këto kushte. Afati taksativ që parashikon neni 8 i ligjit të dekriminalizimit, është tejkaluar dhe prej datës 3 shtator, për shkak se nuk ka dhënë shenjat e gishtërinjve, Agim Kajmaku duhet të mos ishte më në zyrën e kryetarit të Bashkisë së Vorës", tha Bardhi.