Sherr për vendin ku shesin misra, 52- vjeçari bën për spital 4 vetë
Tiranë, Policia arreston 9 persona për krime të ndryshme
TIRANE - Nëntë persona janë arrestuar gjatë natës nga Policia e Tiranës dhe një tjetër është proceduar në gjendje të lirë për vepra të ndryshme penale. Një 52vjeçar është vënë në pranga pasi dyshohet se ka plagosur 4 persona, duke i goditur me sende të forta. Duket se ngjarja ka ndodhur për një sherr thuajse banal, pasi i dyshuari pretendonte se i kishin zënë vendin ku shiste misra të pjekur. I arrestuari është shtetasi me inicialet R. K., 52 vjeç, banues në Tiranë, i dyshuar për veprën penale "Plagosje e rëndë me dashje". Policia tha se ky shtetas, pas një konflikti për motive të dobëta, në zonën e "Ali Demit", ka goditur dhe plagosur me mjete të forta 4 persona. Në njoftimin për arrestimet e kryera gjatë orëve të fundit, Policia tha se u bë arrestimi i shtetasve A. Gj., 16 vjeç, dhe A. I., 19 vjeç, të dy banues në Tiranë, për veprën penale "Vjedhje me dhunë e kryer në bashkëpunim". Këta shtetas në bashkëpunim me njëri- tjetrin i kanë vjedhur me dhunë një telefon shtetasit E. K. U arrestua edhe shtetasi M. H., 29 vjeç, për veprat penale "Vjedhja e kryer në bashkëpunim e mbetur në tentativë" dhe "Dhunimi i banesës", si dhe u procedua në gjendje të lirë shtetasi S. A., 16 vjeç, pasi janë gjetur brenda banesës së shtetases M. Y., si dhe kanë tentuar të vjedhin mjetin e shtetases I. L. Gjithashtu, gjatë natës u arrestua edhe shtetasi M. Ç., 26 vjeç, për veprën penale "Shkelje e rregullave të qarkullimit rrugor". Në rrugën "Llazi Miho", ky shtetas ka aksidentuar me mjet shtetasin L. H., i cili ndodhet në spital nën kujdes mjekësor. Është ndaluar për vjedhje shtetasi V. S., 27 vjeç, banues në Tiranë, pasi në rrugën "Dervish Hima" dhe "Mustafa Matohiti" u ka vjedhur biçikletat shtetasve L. H., dhe K. P. Gjithashtu, gjatë orëve të fundit janë lokalizuar dhe kapur dy shtetas të shpallur në kërkim, konkretisht, Rr. B., 57 vjeç dhe A. A., 61 vjeç, të dy banues në Tiranë, të shpallur në kërkim për veprat penale "Krijimi i skemave mashtruese lidhur me tatimin me vlerën shtuar" dhe "Fshehje e të ardhurave". Po gjatë orëve të fundit është proceduar në gjendje të lirë shtetasja Q. A., 51 vjeçe, për veprën penale "Vënie në dispozicion të lokaleve për lojëra të palejuara", pasi në rrugën "Lord Bajron", gjatë kontrollit të ushtruar në ambientet e brendshme të lokalit barkafe, në pronësi të kësaj shtetaseje, u konstatua një kompjuter, i cili dyshohet se përdorej për zhvillimin e palejuar të lojërave të fatit.