Tumoret e trurit, kryhet ndërhyrja e rrallë në QSUT
Profesor Petrela dhe Henri Marsh realizojnë me sukses operacionin
Edhe një herë tjetër, stafi i QSUT, pacientët dhe të gjithë ne u bëmë dëshmitarë të suksesit të radhës. Dje, një paciente 54- vjeçare nga Elbasani i është nënshtruar një ndërhyrjeje të rrallë në tru, ku i është hequr masa tumorale teksa ishte zgjuar dhe komunikonte me ekipin mjekësor. Ndërhyrja e rrallë u realizua nga ekipi mjekësor i drejtuar nga prof. Mentor Petrela në shërbimin e neurokirurgjisë në QSUT, me asistencën e neurokirurgut me famë botërore, prof. Henry Marsh. Lajmi u bë i ditur nga ministrja Manastirliu, përmes një postimi në rrjetet sociale. “Një ndërhyrje e rrallë në tru në një paciente 54- vjeçare, u realizua në qendrën spitalore ‘ Nënë Tereza’ nga ekipi mjekësor i udhëhequr nga prof. Mentor Petrela, me asistencën e neurokirurgut me famë botërore, prof. Henry Marsh. Kjo është hera e dytë që ndërhyrja delikate e heqjes së masës tumorale në tru, me pacientin zgjuar realizohet në QSUT me prof. Henry Marsh. Punë fantastike e ekipit të neurokirurgjisë me mbështetjen e pakursyer të neurokirurgut britanik, i cili rikthehet në Shqipëri edhe për leksionet mbi inteligjencën artificiale dhe komunikimin me studentët e mjekësisë në Tiranë”, thuhet në postimin e ministres Manastirliu. Rasti i parë i ndërhyrjes me teknikën zgjuar, e njohur në mjekësi si “craniotomy” ka qenë 4 vite më parë, përkatësisht në gusht të 2015. Në sajë të kësaj teknike të re, pacientët qëndrojnë zgjuar përgjatë gjithë ndërhyrjes duke komunikuar me mjekët. Kjo bën që të mos dëmtohen zona të caktuara të trurit, të cilat janë përgjegjëse për të folurën, lëvizjen e gjymtyrëve apo edhe shikimin.