Italia, me marsh të pestë drejt Europianit
Asfaltohet edhe Armenia! Ndoshta nuk ishte aq e lehtë saç ishte menduar, por Roberto Mançini pati të drejtë kur përpara ndeshjes paralajmëroi për shpejtësinë e rivalëve në kundërsulm dhe për formën e tyre fizike më të lartë, sesa "axurrët". Dje nuk u pa Italia e katër ndeshjeve të mëparshme, e cila kishte dhuruar spektakël dhe kishte shkëlqyer në eliminatore, por e rëndësishme është që në fund, të kaltrit kthehen nga Jerevani me fitoren e pestë radhazi në këto eliminatore dhe vazhdojnë të udhëheqin Grupin J me pikë të plota ( 15). Nëse në fillim të zotët e shtëpisë trembën jo pak italianët, me një gol në kundërsulm të Karapetjan, i cili bën engjëllin dhe djallin për kombëtaren e tij ( gol dhe karton i kuq në pjesën e parë), Beloti fillimisht barazon në të 28- ën, ndërsa Lorenco Pelegrini dhe një autogol i portierit armen vulosin shifrat në 3- 1 për "Axurrët. Dhe falë këtij hapi, pjesëmarrja në "Europianin 2020" duket e futur në kasafortë për skuadrën e Roberto Mançinit.
ACAROHET MANÇINI
Italia bën 5 nga 5 në sprintin e saj drejt kualifikimit për në "Euro 2020", por suksesi kundër Armenisë, pa shkëlqyer, nuk i la një shije të mirë trajnerit Roberto Mançinit, ndonëse ky i fundit i kishte paralajmëruar vështirësitë që do të haste në Jerevan. "Nuk jam i nervozuar, pasi e kisha lajmëruar që do të ishte një ndeshje shumë e vështirë. Ata u konfirmuan më në formë sesa ne, por në të njëjtën kohë edhe me 10 vetë na hapën shumë probleme. Në kundërsulm janë shumë të shpejtë dhe rrezikuam. Madje, do kisha qenë më i lumtur sikur arbitri t'ia kishte mohuar atë karton të kuq armenëve, pasi 11 kundër 11 nuk do të mbylleshin aq shumë në pjesën e dytë dhe ndoshta do të kisha qenë më i qetë pas ndeshjes. I acaruar me kë? Pikësëpari me startin e ndeshjes, ku menjëherë pësuam një gol prej amatorësh. E them këtë sepse e kisha paralajmëruar skuadrën që ato do të luanin në kundërsulm, por sërish e pësuam. Më pas u zgjuam, ndonëse në pjesën e dytë manovrat në sulm nuk më lanë një shije të mirë. Kieza duhej të bënte më shumë, prisja që të vinte në lojë cilësitë e tij, por nuk m'u përgjigj. Pastaj, Bernardeski më acaroi në disa raste kur mund të kishim mundësinë që ta luanim shpejt topin, ndërkohë që ai e mbante të frenuar. Madje, në disa raste i duheshin 4- 5 prekje për të kryer më pas pasimin. Këto gjëra nuk më pëlqyen aspak, sepse përballë një skuadre që luan në mbrojtje duhet të luash me pasime të shpejta. Gjithsesi, nuk do t'i bërtas lojtarëve të mi, sepse morëm tri pikët, por tani të korrigjojmë gabimet tona ndaj Finlandës", tha Maçini.
FLET MIKHITARJAN
Henrik Mikhitarjan, kapiteni i Armenisë dhe lojtari më i ri i Romës, pranon humbjen përballë Italisë. "E nisëm mirë, madje edhe pas barazimit 1- 1 patëm një rast të pastër për të rimarrë avantazhin, por nuk ia dolëm, sepse në fund diferencën e bënë individualitetet e Italisë. Na vjen keq, por edhe pse dhamë gjithçka në fund nuk mjaftoi për të dalë me pikë. Kartoni i kuq? Mua m'u duk një dyluftim normal në ajër, por nuk dua të bëj polemikë me arbitrin", tha 30- vjeçari.