PER PENSIONISTET
Dokumentet dhe afatet, si kompensohen katër taksa
PERFITUESIT/ Jo vetëm taksa e pronës dhe dritat, zbardhen taksat dhe detyrimet e tjera mujore që u kompensohen pensionistëve. Lista e dokumenteve që duhen dorëzuar në gjendjen civile dhe sa para kursehen në muaj për çdo taksë e tatim. Kategoritë e përfituesve dhe taksat që përjashtohen
Pensionistët kryefamiljarë dhe ata me pension social janë të parët në morinë e kategorive përfituese të zerimit të shumë taksave e tarifave në fuqi, si dhe ato që do të implementohen nga Bashkia e Tiranës.
Për pensionistët që nuk janë në dijeni të përfitimeve që ua njeh ligji e udhëzimet e dala prej tij, gazeta sjell një përmbledhje të tyre, vlerën mujore dhe rrugën që duhet të ndjekin për të shmangur pagesën e tyre. Përjashtimet për moshën e tretë që jetojnë të vetëm, pa fëmijë në ngarkim, fillojnë që në lidhjen e kontratës me Ujësjellësin, ku ndryshe nga familjarët e tjerë, ky shërbim ofrohet falas, e deri te taksa për infrastrukturën arsimore, tarifa e pastrimit dhe taksa për shtëpinë. Shto këtu dhe taksën për pronën, e cila ndonëse nuk ka nisur të vilet, parashikon përjashtimin nga detyrimi për kategorinë e lartpërmendur. Për taksën për pronën, por edhe të tjerat, rregullat janë të njëjta. Mjafton të kopsitin listën e dokumenteve përbri shkrimit, përmes të cilave vërtetojnë gjendjen e tyre, duke i dorëzuar pranë njësisë administrative apo lagjes që i përkasin. Është kjo e fundit që siguron përmes Drejtorisë së Tatimtaksave, që në faturën e ujit, të katër taksat e tarifat e mësipërme të vijnë në vlerën zero. VLERA E PËRFITIMIT Prej më shumë se katër vitesh, çdo banor i Tiranës paguan çdo muaj në faturën e ujit një taksë në vlerën e 150 lekëve në muaj, që për shtatë vite rresht ka destinacion shkollat e qytetit. Hartuesit e projektvendimit e kanë parë të arsyeshme që pensionistët të mos e bëjnë këtë gjë. Një taksë fikse, që paguhet prej vitesh dhe shkon për llogari të qeverisë ( jo të Bashkisë së Tiranës), është ajo mbi ndërtesën dhe është në vlerën e 100 lekëve për muaj. Një tjetër detyrim që rëndon veçanërisht xhepin e një pensionisti, është tarifa e pastrimit, 420 lekë në muaj. Taksa për pronën, që pritet të hyjë në fuqi në 2020- ën dhe do të vilet përmes Ujësjellës Kanalizimeve është një tjetër detyrim që mund të shmanget nga disa kategori, përfshi pensionistët. Sipas vendimit të qeverisë, taksa për pronën është 0.05 për qind e vlerës së një metri katror në vit dhe mesatarisht për një apartament 80 metra katrorë, kjo përllogaritet në vlerën e 3600 lekëve në vit ose 300 në muaj, shumë që do e paguajë çdo familje që posedon një pronë, përveç pensionistëve që jetojnë të vetëm, pa të ardhura të tjera në familje. Në total, janë katër taksa për vjeljen e të cilave shërben si agjent tatimor Drejtoria e Ujësjellës Kanalizimeve. Nëse një pensionist kryefamiljar ose me pension social ndjek procedurën e nevojshme për t'i shmangur, në fund të muajit përllogaritet të ketë afro 1 mijë lekë më shumë në xhep.