Legalizimet, familjet që marrin tapitë në Tiranë

Agjencia e Kadastrës publikon listën e re me 1096 familje që marrin tapitë e legalizimit në Tiranë. Emrat e përfituesve të rinj dhe procedurat që duhet të ndjekin

Agjencia e Kadastrës Tirana Rurale ka publikuar dje emrat e qytetarëve, që kanë gati lejen e legalizimit.

Janë mbi 1 mijë familje, të cilat duhet të paraqiten në sportelet e Agjencisë për të nisur procedurat e regjistrimit dhe marrjes së certifikatës së pronësisë.

MARRJA E TAPISË

"Personat që gjejnë emrin në ketë listë, janë të lutur të paraqiten pranë Zyrës së Marrëdhënieve me Publikun për të plotësuar aplikimin tuaj. Ju keni fituar lejen e legalizimit, por duhet të plotësoni dokumentacionin përkatës për t'u pajisur me certifikatën e pronësisë.

Specialistet e ASHK- së Vendore Tirana Rurale 1 do të jenë në dispozicionin tuaj për t'ju orientuar me shërbimet, që duhet të aplikoni pranë sporteleve të ADISA- s", thuhet në njoftimin e Agjencisë. Në këtë fazë të dytë, të vetmin detyrim që do të kenë qytetarët është shlyerja e tarifës së shërbimit, e cila është në vlerën e 8 mijë lekëve.

LEJET

Në të gjithë vendin janë mbi 80 mijë familje, cilat edhe pse e kanë marrë lejen e legalizimit nga ALUIZNI, nuk e kanë ende në duar tapinë. Me reformën e ndërmarrë, regjistrimi i këtyre pasurive do të bëhet nga Agjencia Shtetërore e Kadastrës. Kjo strukturë e re do të ketë si sfidë të parë të saj zerimin e praktikave të prapambetura, duke pajisur këto familje me një titull pronësie që ka vlefshmëri ligjore. Regjistrimi i këtyre lejeve do të bëhet në një sistem të posaçëm. Kjo do të bëhet për të marrë kohë deri në përmirësimin e dokumentacionit hartografik. Nga ana tjetër, qytetarët nuk do të jenë të penalizuar, pasi pajisja e tyre me dokumentin e pronësisë do të bëhet menjëherë, ndërkohë që regjistrimi përfundimtar do të jetë një procedurë, e cila do të jetë në ngarkim të Kadastrës me zero detyrime për qytetarët.