Kryemadhi mesazhe për Luftën e politikat e majta, Ruçi thyen akujt, shkon në 15- vjetorin e LSI- së
“Festa jonë përkon me 75- vjetorin e çlirimit të atdheut, LANÇ ngjarje e madhe krenarie, po mohohet me harresën e turpshme qeveritare”
Kryetarja e Lëvizjes Socialiste për Integrim, Monika Kryemadhi, akuzoi dje Kryeministrin Edi Rama se ndjek politika diskriminuese dhe përçarëse për qytetarët.
Sipas Kryemadhit, për shkak të politikave të këqija ekonomike dhe sociale të ndjekura nga qeveria e këtyre 6 viteve, të rinjtë e vendit po e shikojnë të ardhmen e tyre jashtë Shqipërisë. Këto akuza kryetarja e LSI- së i bëri nga Pallati i Kongreseve gjatë ceremonisë festive me rastin e 15- vjetorit të krijimit të kësaj partie. Kryemadhi tha se LSI- ja i ka shpëtuar goditjeve të paprincipta që synonin eliminimin e tyre politik dhe theksoi se misioni i LSI- së është të kthejë të majtën në “shina”. “Sot, bota politike, intelektuale dhe akademike, nga vendi më i vogël i rruzullit e deri te më i madhi, po diskuton e debaton një problem të mprehtë, që në Shqipëri, fatkeqësisht për kushtet dhe veçoritë, sidomos në këto vitet e regjimit të Rilindjes, nuk është thjesht një problem, por një dramë që po shkatërron këtë vend, që ka mpirë shoqërinë dhe po i çon djemtë dhe vajzat tona gjithnjë e më shumë larg Shqipërisë. E kam fjalën për thellimin e polarizimit të shoqërisë sonë dhe pabarazisë në të”, tha Kryemadhi. Kryetarja e LSI- së tha se vetëm një politikë e majtë moderne mund të shuajë pabarazinë ekonomiko/ sociale në Shqipëri. “Unë jam e vëmendshme ndaj çdo alternative ekonomike që shpaloset nga çdo krah, nga çdo parti e djathtë, e qendrës apo kudo qoftë. Por njëkohësisht jam e bindur dhe e ndërgjegjshme që Shqipëria nuk shpëton nga drama e pabarazisë pa një të majtë të fortë e moderne, të hapur e të shëndetshme e mbi të gjitha që të ketë të shenjtë interesat kombëtare dhe shërbimin ndaj qytetarëve”, u shpreh Kryemadhi. Pas aktivitetit në Pallatin e Kongreseve, LSI organizoi një koktejil në hotel “Rogner” ku morën pjesë mjaft figura të rëndësishme si diplomatë, politikanë, gazetarë etj. Në 15- vjetorin e LSI- së ra në sy prezenca e Kryetarit të Kuvendit, Gramoz Ruçi, i cili është ndër figurat më të rëndësishme në Partinë Socialiste. Ruçi është fotografuar në prani të kryetares së LSI- së, Monika Kryemadhi.
LANÇ Kryetarja e LSI- së vlerësoi 75- vjetorin e çlirimit të atdheut dhe rolin e Luftës Antifashiste Nacionalçlirimtare, por akuzoi për harresë qeverinë për të festuar këtë ditë. “Për mua si kryetare e LSI- së dhe për të gjithë ne, anëtarët, simpatizantët dhe votuesit e LSI- së, është një moment fatlum dhe rastësi e bukur që 15- vjetori i krijimit të partisë sonë koinçidon me 75- vjetorin e çlirimit të atdheut, të kësaj ngjarjeje të madhe krenarie, sepse Lufta Antifashiste Nacionalçlirimtare dhe Antifashizmi si vlera e saj universale, jo vetëm i sollën popullit lirinë, por e bënë Shqipërinë kontribuuese të denjë në koalicionin antifashist botëror, në koalicionin e madh të vlerave e të sakrificave, mbi të cilat u ngrit Europa e Bashkuar. Ne jemi krenarë për historinë tonë, por ndihemi përherë të detyruar ta nderojmë atë, të nderojmë sakrificat e një populli të tërë dhe gjakun e dëshmorëve të lirisë, që nuk mund të përbalten dhe as të mohohen me harresën e turpshme qeveritare, që në këtë jubile të lavdishëm nuk thotë asnjë fjalë e as e përmend 75- vjetorin e çlirimit të atdheut!”.
ALTERNATIVA Kryetarja e LSI- së foli edhe për krizën politike, në të cilën vendi ndodhet prej 9 muajsh. Kryemadhi tha se opozita nuk mund të merrte dot pjesë në zgjedhjet e 30 qershorit, pasi ato nuk garantonin siguri. Sipas kryetares së LSI- së, protestat e opozitës e kanë dhënë mesazhin e tyre, por ato nuk mjaftojnë. “Ndaj, sfida jonë vazhdon të mbetet rikthimi i shpresës dhe besimit te një e majtë e vlerave dhe e principeve, që do mund ta nxjerrë vendin nga bataku ku e ka zhytur Edi Rama. Për këtë, të gjithë së bashku duhet të kthejmë demokracinë në normalitet”, tha Kryemadhi.