“Sqaroni blerjen e votave dhe 30 qershorin”, kushtet gjermane për hapjen e negociatave

“Të sqarohet ligjshmëria e zgjedhjeve lokale të qershorit 2019 dhe të sqarohen akuzat për shitblerjen e votave në disa zona”

“Deutsche Welle” shkruan dje se Gjermania mund të vendosë kushte të reja për hapjen e negociatave me Shqipërinë.

Në një shkrim të publikuar dje, thuhet se diskutimi ende nuk ka nisur në Parlamentin gjerman, por qëndrimet, edhe nëse do të ishin pozitive, ato do të shoqëroheshin me kushte që lidhen me qartësimin nëse zgjedhjet e 30 qershorit u zhvilluan brenda një kuadri të qartë ligjor apo dhe sqarimit lidhur me akuzat për shitblerjen e votave, për të cilat Prokuroria shqiptare po heton. “Siç duket, një pjesë e madhe e deputetëve të CDU/ CSU- së janë të prirur t’i japin Shqipërisë një ‘ Po me kushte’, por ka edhe një pakicë të vogël, por e fortë, që mendon se Shqipëria nuk është ende gati as për këtë. Përveç kushteve të formuluara edhe më parë në lidhje me reformën e gjyqësorit, luftën kundër korrupsionit, krimit të organizuar dhe të drogës, Reformën Zgjedhore, pritet të shtohen edhe kushte të tilla si sqarimi i ligjshmërisë së zgjedhjeve lokale të qershorit 2019, si edhe sqarimi i akuzave për shitblerjen e votave në disa zona”, thuhet në shkrimin e djeshëm të “Deutsche Welle” në seksionin shqip. Diskutimi për negociatat e Shqipërisë me BE- në në Parlamentin gjerman pritet të nisin menjëherë, ndërsa do të jetë dhe Kryeministri Rama, i cili do të jetë në Berlin javën e ardhshme. Grupi i punës për të përgatitur qëndrimin drejtohet nga nënkryetari i Grupit Parlamentar të CDU/ CSU- së Johann David Wadephul, i cili ka mbajtur qëndrime kritike ndaj situatës politike në Shqipëri. “CDU/ CSU në Gjermani gjatë shtatorit do të përcaktojë pozicionin lidhur me procesin e negociatave BE- Shqipëri. Gjatë javës së ardhshme do të ketë konsultime në Berlin, ku pritet të vijë edhe Kryeministri shqiptar. Siç mësoi “Deutsche Welle” nga qarqet e CDU/ CSUsë në Berlin, javën e ardhshme deputetët e grupit më të madh në Parlamentin e Gjermanisë ( Bundestag), do të merren intensivisht me Shqipërinë, në kërkim të një qëndrimi për çeljen e negociatave. Të involvuar do të jenë kryesisht deputetët kristiandemokratë e kristiansocialë të grupit të punës së Ballkanit Perëndimor, i cili drejtohet nga nënkryetari i Grupit Parlamentar të CDU/ CSU- së, Johann David Wadephul ( CDU), si dhe grupet e punës për çështje të Bashkimit Europian dhe të Jashtme. Gjatë javës së ardhshme, ata pritet të takohen si me përfaqësues të qeverisë gjermane, ashtu edhe me vetë Kryeministrin e Shqipërisë, Edi Rama. Ky i fundit pritet të vijë të premten e ardhshme ( 13.09) në Berlin”, vijon shkrimi i “Deutsche Welle”. Brenda 27 shtatorit pritet të ketë një votim në Parlamentin gjerman për qëndrimin ndaj hapjes së negociatave me Shqipërinë. “Vendimin përfundimtar grupi i CDU/ CSU- së pritet ta marrë në datën 24 shtator. Qëndrimi i CDU/ CSU- së duhet të jetë i njëjtë me atë të qeverisë gjermane dhe të partnerit të koalicionit SPD. Kjo e fundit, dhe Ministria e Jashtme e drejtuar prej saj, është shprehur qysh më parë për një fillim të menjëhershëm të negociatave me Shqipërinë. Nëse palët arrijnë t’i unifikojnë qëndrimet e tyre, pritet që më 27 shtator ky qëndrim të votohet në seancën plenare të Bundestagut”, përfundon shkrimin e saj “Deutsche Welle”.