“Meta e paska personale”, debati i deputetëve të PS me këshilltarin e Presidenit
Fino: “Meta e paska personale me mua si relator”. Këshilltari i Presidentit: “Asgjë personale, po kërkojmë të ruajmë autonominë vendore”
Komisioni i Ligjeve ka rrëzuar të premten dy dekretet e radhës të Presidentit të Republikës së Shqipërisë, atë për ligjin nr. 139/ 2015 “Për vetëqeverisjen vendore” dhe ligjin nr. 7895, datë 27.1.1995 “Kodi Penal i Republikës së Shqipërisë”, të ndryshuar. Kundër dekretit të kreut të shtetit votuan edhe disa nga deputetët e opozitës së re. Në javën e parë të sesionit të ri parlamentar, komisionet parlamentare kanë rrëzuar 7 dekrete nga 9 që ka kthyer kreu i shtetit në Kuvend. Këshilltari juridik i kreut të shtetit, Bledar Dervishaj, u kërkoi deputetëve që ta miratojnë dekretin e Presidentit për ligjin për vetëqeverisjen vendore, pasi ndryshimet e bëra në dy nene nga relatori Fino, ulin rolin vendimmarrës të këshillave bashkiakë, lidhur me vendime që kanë të bëjnë me tjetërsimin dhe dhënien me qira të pronës publike. Si relator i ndryshimeve në ligj, por edhe në shqyrtimin e Dekretit të Presidentit, deputeti i maxhorancës, Bashkim Fino, i konsideroi rezervat e Presidentit si të pavenda, madje edhe tendencioze ndaj tij personalisht. Sipas Finos, për herë të parë rezervat e Presidentit i drejtoheshin relatorit dhe jo vetë Kuvendit, ndërkohë që argumentoi se ulja e votave të Këshillit Bashkiak nga 2/ 3 në ½ aplikohet vetëm për rastet e qiradhënies dhe se është bërë për të rritur autonominë e organeve të qeverisjes vendore. Ndërkohë që ishin 4 nenet e Kodit të ri Penal, ndaj të cilëve institucioni i Presidentit ka paraqitur rezerva të forta. E pranishme gjatë punimeve të komisionit, ministrja e Drejtësisë, Etilda Gjonaj, i rrëzoi pretendimet e Presidentit me argumentin se ndryshimet në Kodin penal kanë si qëllim mbrojtjen e zyrtarëve dhe institucioneve shtetërore dhe dënimin e nëpunësve publikë që shkelin ligjin. Ndërsa sipas deputetit Braho, kthimet e dekreteve të Presidentit nuk kanë qenë dinjitoze.
DEBATI Bledar Dervishaj: Gjatë shqyrtimit parlamentar nga relatori janë bërë disa ndryshime, të cilat cenojnë procesin vendimmarrës të këshillave bashkiakë në lidhje me tjetërsimin e pronave publike. Këto ndryshime janë të pajustifikuara, pasi mënyra e re që propozohet për kuorumin e nevojshëm në këshillat bashkiakë dhe vendimmarrjes së tyre, nuk garanton mbrojtjen e interesit publik.
Bashkim Fino: Po vërej me keqardhje, personale e kam këtë jo politike, që i gjithë relacioni është drejtuar kundër relatorit. Tani, me çfarë duket, ose Presidenti e ka personale me mua, ose ju si këshilltar e keni personale me mua. A thua se unë si relator qenkërkam një relator antikushtetues. Tani më lejoni t’ju them dhe t’ju drejtohem mediave, se Presidenti im i nderuar, që unë kam shumë respekt, para se t’u bënte President, ka qenë 4 vjet kryetar i Kuvendit të Republikës së Shqipërisë. Ai i di mirë procedurat se si veprohet kur një projektligj vjen nga qeveria apo një grup deputetësh në Parlamentin shqiptar, se e ka drejtuar për 4 vjet atë. Në çdo komision përkatës ka një relator që përgjigjet për projektligjin, në rastin konkret dhe që e paraqet para kolegëve në çdo komision. Është komisioni dhe relatori ai që bën ndryshimet e nevojshme, ose që nuk bën ndryshime fare, dhe pastaj në fund definon seanca plenare. Këtë praktikë kam ndjekur unë z. Ilir Meta, kur ti ishe kryetar Kuvendi dhe këtë praktikë kam ndjekur edhe sot.
Bledar Dervishaj: Jo për të debatuar me relatorin e projektligjit, por më duhet ta saktësoj pozicionin e Presidentit. Vlerësimi i një ligji bëhet vetëm mbi atë që ligji flet vetë, aktin e miratuar dhe procedurën parlamentare. Në qoftë se është cituar relatori në relacionin e Presidentit të Republikës dhe arsyet e dekretit, kjo ka të bëjë me faktin e konstatimit, gjetjet gjatë procedurës së të gjithë konstatimit të ligjit dhe nuk ka asgjë personale në këtë proces. Sa i takon arsyetimit me përmbajtjen e dy neneve 3 apo 4, ne e kemi sqaruar qartësisht se në konceptin tonë zhvillimi i pronës dhe bashkëpunimi me një subjekt privat sjell tjetërsimin e saj në të tria palët.
Bashkim Fino: S’po flas për çështjen e dytë, po flas për çështjen e parë. Z. Dervishaj, faleminderit që më qetësove, sepse s’më kishte zënë gjumi që kur e lexova dhe thosha me vete “ore çfarë ka Presidenti dhe këshilltarët ligjorë me mua si relator?!”. Por më lejoni t’ju them që është rasti i parë që në kthimin e një dekreti, në rastin konkret, sapo e lexova në relacion, përmendet vetëm relatori. Këtu më qetësove me këtë që më the, që nuk kemi gjë personale, faleminderit shumë. Bledar Dervishaj: Mund të shtoj edhe diçka? Bashkim Fino: Jo, s’mund të flasësh ti pas meje! Bledar Dervishaj: Është rasti i disatë, që në arsyetimin e Presidentit përmendet relatori. Dhe rasti më i fundit që më duhet t’jua kujtoj, është relatori Arben Ahmetaj, për ligjin për koncesionet.
Spartak Braho: Zoti Dervishaj, po ia hiqni tullat Presidentit. Nuk është dinjitoze që Presidenti të kërkojë rregullimin e teknikës legjislative. Në 21 dekrete, ju nuk keni ngritur asnjë problem të mirëfilltë kushtetues. Bëhuni me dinjitoz.
Bledar Dervishaj: Kam përshtypjen që ndoshta është ulur cilësia e vendimmarrjes legjislative të Kuvendit, jo e Presidentit.
Spartak Braho: Zoti Dervishaj, po ia hiqni tullat Presidentit. Nuk është dinjitoze që Presidenti të kërkojë rregullimin e teknikës legjislative. Në 21 dekrete, ju nuk keni ngritur asnjë problem të mirëfilltë kushtetues. Bëhuni me dinjitoz.
Bledar Dervishaj: Kam përshtypjen që ndoshta është ulur cilësia e vendimmarrjes legjislative të Kuvendit, jo e Presidentit