Ruçi: Asnjë pengesë për bashkëpunimin shqiptaro- grek
“Popujt tanë merren vesh me njeri- tjetrin më mirë sesa qeveritë”
Kryetari i Kuvendit, Gramoz Ruçi, vlerësoi miqësinë dhe bashkëpunimin mes grekëve dhe shqiptarëve. Kryeparlamentari priti dje në një takim në Kryesinë e Kuvendit, ambasadoren e Republikës së Greqisë, Eleni Sourani, me rastin e mbarimit të mandatit të saj në Shqipëri. Ruçi e falënderoi ambasadoren Sourani për shërbimin e saj në të mirë të forcimit të marrëdhënieve e të bashkëpunimit midis dy vendeve, ndërsa vlerësoi edhe fqinjësinë e mirë mes dy vendeve dhe rolin e emigrantëve shqiptarë në Greqi dhe minoritetit grek në Shqipëri. “Shqipëria dhe Greqia janë dy vende fqinje dhe mike. Marrëdhëniet dhe bashkëpunimi ynë duhet të thellohen. Nuk ka asnjë pengesë për fuqizimin e bashkëpunimit shqiptaro- grek. Emigrantët shqiptarë në Greqi dhe minoritarët grekë në Shqipëri shërbejnë si ura të fqinjësisë e miqësisë midis dy vendeve. Popujt tanë kanë treguar se dinë të merren vesh e të bashkëpunojnë me njeri- tjetrin më mirë sesa qeveritë”, u shpreh Kryetari i Kuvendit në takimin me ambasadoren e Greqisë, Eleni Sourani. Nga ana e saj, ambasadorja e Greqisë e falënderoi Kryetarin Gramoz Ruçi për mbështetjen e Kuvendit të Shqipërisë si edhe për kontributin personal në përmirësimin e marrëdhënieve midis të dy vendeve. Sipas saj, 65 mijë familjet e përziera shqiptaro- greke vetëm e fuqizojnë miqësinë mes dy popujve. “Urtësia juaj ka qenë një mbështetje e madhe për përmirësimin e marrëdhënieve dypalëshe. Nuk ka asnjë rrethanë midis dy vendeve tona që të pengojë fuqizimin e miqësisë e të marrëdhënieve midis Shqipërisë e Greqisë. Rreth 65 mijë familjet e përziera shqiptaro- greke janë një faktor tjetër për fuqizimin e miqësisë midis popujve”, nënvizoi ambasadorja Sourani.