ODIHR, Cakaj: Ndërkombëtarët u keqinformuan nga opozita
Bardhi: S’është përgjegjësi e opozitës për kapjen e shtetit nga Rama
Raporti i OSBE/ ODIHRit për zgjedhjet e 30 qershorit për ministrin e Jashtëm në detyrë, Gent Cakaj, i vlerëson ato si të rregullta dhe demokratike.
Gjatë një deklarate për mediat për të komentuar raportin, Cakaj tha se “raporti i OSBE/ ODIHR- it i vlerëson zgjedhjet e 30 qershorit si një proces i rregullt, demokratik dhe i njohur ndërkombëtarisht”. “Tani,- tha ai,- kemi edhe një udhërrëfyes sesi mund të rritet besueshmëria dhe cilësia e organizimit të zgjedhjeve”. Raporti evidenton se klima gjatë fushatës ishte tepër e polarizuar dhe nuk u është kushtuar vëmendje programeve elektorale apo debateve dhe kjo, sipas Cakajt, është rrjedhojë e natyrshme e një procesi atipik elektoral ku përgjegjësia u takon atyre që e kanë bojkotuar procesin. “Opozita në veçanti ka ushtruar presion madhor për mospjesëmarrje në zgjedhje. Kjo tregon se klima e zgjedhjeve ka qenë e ndikuar negativisht jo për shkak të veprimeve abuzive të qeverisë, por për shkak të një sjelljeje të caktuar politike që ne nuk e dëshirojmë”, tha Cakaj. Përkundër kësaj sjellje, Cakaj tha se “askund në raport nuk konstatohet se zgjedhjet kanë qenë jolegjitime, sepse opozita ka vendosur të mos marrë pjesë në to”.
AKUZAT Ai akuzoi opozitën se ka keqinformuar faktorin ndërkombëtar për procesin zgjedhor. Përveç dhunës vandaliste, opozita, sipas tij, “ka edhe një program të mirëplanifikuar për të dëmtuar procesin e hapjes së negociatave në qershor dhe tani në tetor”. Cakaj tha se “gjatë këtyre ditëve është diskutuar mbi përmbajtjen e raportit dhe ka ekzistuar përpjekja për të keqpërdorur referencat e ndryshme ndërkombëtare para opinionit vendor”. “PD dhe LSI janë të angazhuara në keqinformimin e faktorëve ndërkombëtarë, ndërsa tani kanë keqpërdorur referencat ndërkombëtare për konsum të brendshëm. Ky raport është më shumë kritik për opozitën sesa për procesin e zgjedhjeve vendore në veçanti”, tha Cakaj. Sa u takon dilemave juridike, Cakaj tha se “raporti nuk vjen në përfundimin se kjo është shkaktuar nga një ndërmarrje e njëanshme e qeverisë shqiptare, por rrethana e parë është mungesa e kuorumit në Gjykatën Kushtetuese, që vjen si rrjedhojë e Reformës së paprecedent në Drejtësi dhe e dyta, zhdekretimi i zgjedhjeve dhe bojkotimi i tyre”. Cakaj tha se “është koha për reflektim të sinqertë dhe marrje të përgjegjësive të secilit për gjetjet e raportit”. “Nuk mund të jesh shkaktar i një problemi dhe të ankohesh se ekziston ai problem. Kjo është e papërgjegjshme”, tha Cakaj.
REAGIMI Partia Demokratike, me anë të Sekretarit të Përgjithshëm, Gazment Bardhi, ka reaguar menjëherë pas deklaratave të ministrit të Jashtëm në detyrë, Gent Cakaj, ku ky i fundit tha se ishte opozita ajo që ndikoi në komentet negative të raportit të OSBE/ ODHIR për zgjedhjet e 30 qershorit. Bardhi tha se nuk është përgjegjësi e opozitës pse KQZ ka shkelur ligjin dhe pse gjyqtarët e Kolegjit Zgjedhor ishin nën presionin e qeverisë apo pse punonjësit e administratës u shantazhuan. “Për herë të parë në historinë e vëzhgimit të zgjedhjeve nga OSBE/ ODIHR nuk specifikohet që zgjedhjet ishin demokratike. Për herë të parë specifikohet se veprime dhe sjellje të qeverisë, institucioneve të tjera, përfshi Gjykatën dhe Prokurorinë, kanë qenë tërësisht në kundërshtim me ligjin. Për këtë nuk mund të jetë përgjegjëse opozita. Opozita nuk ka asnjë përgjegjësi pse KQZ ka shkelur ligjet e shtetit, pse gjyqtarët e Kolegjit Zgjedhor kanë qenë nën presionin e qeverisë, pse punonjësit e administratës u shantazhuan dhe u kërcënuan. Raporti skanon të gjithë shtetin privat që ka ndërtuar Edi Rama”, tha Bardhi ndër të tjera.