Negociatat, vendimi i BE- së kalon nga 30 qershori
Akuzat ndaj qeveritarëve për blerjen e votës në Dibër
Ligjshmëria e zgjedhjeve të 30 qershorit duket se do ndikojë në vlerësimin e vendeve anëtare të BE- së për t’i thënë Po ose Jo hapjes së negociatave me Shqipërinë. Gjermania, një nga vendet me peshë në vendimmarrjen e BE- së për hapjen e negociatave, i ka përfshirë zgjedhjet e 30 qershorit, gjithashtu edhe akuzat për përfshirje të qeveritarëve në blerjen apo ndikimin në votë në zgjedhjet e Dibrës, por dhe në Durrës në 2017. Raporti përfundimtar i ODIHR- it, i cili kaloi në skaner zgjedhjet e 30 qershorit, evidentonte disa momente debutuese, përgjigjen e të cilave mund ta japë vetëm Gjykata Kushtetuese. “Më 27 qershor, Presidenti Meta shpalli një dekret tjetër, duke caktuar 13 tetor 2019 si datën e zgjedhjeve lokale. Gjatë kësaj kohe, KQZ vazhdoi përgatitjet për mbajtjen e zgjedhjeve më 30 qershor. Ndryshe nga dekreti i 10 qershorit, dekreti i 27 qershorit mbeti i pabotuar në Fletoren Zyrtare, megjithëse botimi i akteve të nxjerra nga Presidenti kërkohet nga ligji”, nënvizohet në raport, duke lënë shteg interpretimi për ligjshmërinë ose jo të tyre. Ndërsa në një tjetër konstatim të raportit, thuhej se “në zgjedhjet e 30 qershorit shqiptarët nuk patën mundësi të zgjidhnin, për shkak se në shumicën e rasteve kishte vetëm një kandidat, ndërsa edhe në ato raste kur kushte më shumë se një, votuesi nuk pati mundësi të informohet për programe alternative qeverisëse për pushtetin vendor në bashkinë e vet”. Këto konstatime të raportit të vëzhguesve ndërkombëtarë të zgjedhjeve në Shqipëri duket se do të kalojnë në filtrin e parlamenteve para se ato të marrin një vendim për Shqipërinë. Por edhe dosjet “184” dhe “339” të Prokurorisë së Krimeve të Rënda dhe të publikuara në tabloidin gjerman “Bild”, kanë zënë vend në perceptimin e europianëve për zhvillimet politike në Shqipëri. Në të dyja dosjet, përgjimet e të cilave janë publikuar dhe në media, janë interceptuar ministra dhe deputetë të Partisë Socialiste që influencojnë për të siguruar vota në Durrës dhe Dibër përmes personave me precedentë penalë, por dhe përmes presionit në administratë për të dhënë votën për kandidatët e PS. Përgjimet e publikuara nga “Bild” tregonin komunikimin e ish- kryebashkiakut të Durrës, Vangjush Dako, me anëtarë të bandës së Avdylajve në Shijak, të cilët garantonin vota të sigurta për Partinë Socialiste në zgjedhjet parlamentare të 2017. Ndërsa në dosjen “184” për zgjedhjet e pjesshme për Bashkinë e Peshkopisë, në përgjime dalin që nga Kryeministri Rama e me radhë ish- ministrat Damian Gjiknuri, Saimir Tahiri apo dhe deputetët Pjerin Ndreu, Ulsi Manja etj., të cilët kërkonin angazhim të administratës publike në mbledhjen e votave për kandidatin e Partisë socialiste. Opozita i ka denoncuar këto dosje në faktorin ndërkombëtar sa herë i është dhënë mundësia, duke ngritur dhe kauzën e saj se pa largimin e Edi Ramës, nuk hapen negociatat dhe nuk mund të ketë zgjedhje të lira dhe të ndershme në Shqipëri.