Mitsotakis kërcënon Shqipërinë: Nuk hapen negociatat me BE pa akte pro minoritetit grek

“Greqia s’do ta miratojë hapjen e negociatave të Shqipërisë në BE nëse nuk ka akte konkrete për heqjen e diskriminimit ndaj minoritetit grek”

Kryeministri grek, Kyriakos Mitsotakis, u shpreh dje kundër hapjes së negociatave të Shqipërisë me Bashkimin Europian.

Duket se minoriteti grek në Shqipëri është bërë pengesë për të marrë votën pro të Greqisë për hapjen e negociatave. Gjatë fjalës së tij të parë si Kryeministër i Greqisë në ceremoninë e inaugurimit të Panairit të 84- t Ndërkombëtar të Selanikut, Mitsotakis tha se pret të shohë hapa konkretë nga qeveria e Shqipërisë në lidhje me të drejtat e minoritetit grek në Shqipëri. “Greqia nuk do ta miratojë hapjen e negociatave anëtarësuese të Shqipërisë në BE, në rast se unë nuk shikoj akte konkrete për heqjen e diskriminimit ndaj minoritetit etnik grek”, ka deklaruar Mitsotakis ndër të tjera. Mediat greke njoftojnë për kontakte të vazhdueshme të përfaqësuesve të minoritetit grek në Shqipëri me Kryeministrin e ri të Greqisë, kryesisht kreun e PBDNJ- së dhe drejtues të shoqatës OMONIA. Kreu i qeverisë greke ka theksuar se për këtë çështje ka biseduar gjatë vizitave të tij të fundit me Presidentin francez, Makron, Kryeministrin holandez, Route, dhe Kancelaren gjermane, Merkel. “Jam plotësisht i qartë në këtë çështje, ia kam transmetuar edhe Presidentit Makron, edhe Kryeministrit holandez Route, edhe Kancelares Merkel, pasi priten bisedime në Këshillin Europian në tetor. Nuk jemi atje ende. Do të duhet të shohim ndryshime me vepra të qëndrimit të qeverisë shqiptare ndaj minoritetit kombëtar grek”, u shpreh Mitsokatis.

GJERMANIA Mjafton një votë kundër në mbledhjen e Këshillit Europian, që Shqipërisë t’i refuzohet hapja e negociatave me Bashkimin Europian më 18 tetor. Parlamenti dhe qeveria gjermane ende nuk kanë një qëndrim përfundimtar për Shqipërinë, edhe pse sipas agjencisë së lajmeve “Deutsche Welle” mund të ketë kushte të reja për Shqipërinë. “Deutsche Welle”, në një shkrim të publikuar pak ditë më parë, shkruan se diskutimi ende nuk ka nisur në Parlamentin gjerman, por qëndrimet, edhe nëse do të ishin pozitive, ato do të shoqëroheshin me kushte që lidhen me qartësimin nëse zgjedhjet e 30 qershorit u zhvilluan brenda një kuadri të qartë ligjor, apo dhe sqarimit lidhur me akuzat për shitblerjen e votave, për të cilat Prokuroria shqiptare po heton. “Siç duket, një pjesë e madhe e deputetëve të CDU/ CSU- së janë të prirur t’i japin Shqipërisë një ‘ Po me kushte’, por ka edhe një pakicë të vogël, por e fortë, që mendon se Shqipëria nuk është ende gati as për këtë. Përveç kushteve të formuluara edhe më parë në lidhje me reformën e gjyqësorit, luftën kundër korrupsionit, krimit të organizuar dhe të drogës, Reformën Zgjedhore, pritet të shtohen edhe kushte të tilla si sqarimi i ligjshmërisë së zgjedhjeve lokale të qershorit 2019 dhe sqarimi i akuzave për shitblerjen e votave në disa zona”, thuhet në shkrimin e djeshëm të “Deutsche Welle” në seksionin shqip. “CDU/ CSU në Gjermani, gjatë shtatorit do të përcaktojë pozicionin lidhur me procesin e negociatave BE- Shqipëri. Gjatë javës së ardhshme do të ketë konsultime në Berlin, ku pritet të vijë edhe Kryeministri shqiptar. Siç mësoi “Deutsche Welle” nga qarqet e CDU/ CSU- së në Berlin, javën e ardhshme deputetët e grupit më të madh në Parlamentin e Gjermanisë ( Bundestag), do të merren intensivisht me Shqipërinë, në kërkim të një qëndrimi për çeljen e negociatave. Të involvuar do të jenë kryesisht deputetët kristiandemokratë e kristiansocialë të grupit të punës së Ballkanit Perëndimor, i cili drejtohet nga nënkryetari i Grupit Parlamentar të CDU/ CSU- së, Johann David Wadephul ( CDU), si dhe grupet e punës për çështje të Bashkimit Europian dhe të jashtme. Gjatë javës së ardhshme, ata pritet të takohen si me përfaqësues të qeverisë gjermane, ashtu edhe me vetë Kryeministrin e Shqipërisë, Edi Rama. Ky i fundit pritet të vijë të premten e ardhshme ( 13.09) në Berlin”, vijon shkrimi i “Deutsche Welle”.