Karburantet me shkelje, zbardhen emrat e kompanive
"I shkaktuan buxhetit të shtetit dëm në vlerën e 1 milion eurove"
Ashtu siç edhe ishte paralajmëruar në muajin gusht, Drejtoria e Doganave ka publikuar emrat e karburanteve që janë gjetur me shkelje në aksionin antiinformalitet.
Përmes një deklarate për mediat, kreu i këtij institucioni, Arlind Gjokuta, ka bërë me dije emrat e kompanive që sipas tij i kanë shkaktuar buxhetit të shtetit një dëm financiar në vlerën e mbi 1 milion eurove. "Siç premtuam pak ditë më parë, jam sot ( dje) në këtë dalje publike, për të ndarë me ju rezultatet e kontrollit mbi të gjithë operatorët e sistemit me shumicë në vend që importojnë, tregtojnë apo prodhojnë karburante dhe gaz, të gatshëm për konsum. Në total, nga i gjithë procesi i kontrollit rezultuan diferenca për 752,015 litra karburant dhe 77,451 litra gaz. Në total, detyrimi i munguar dhe penalitetet për këto sasi janë rreth 129 mln lekë ( 1.06 mln euro)", tha Gjokuta.
KOMPANITË ROYAL TRADE COMPANY sha, PORTO ROMANO OIL sha, GENKLAUDIS sha, EUROPETROL sha, EROIL sha, BOLUNMEZ PETROL sha, LA PETROLIFERA ITALO - ALBANESE sha, MARE OIL sha dhe TOSK ENERGJI sha janë emrat e kompanive, të cilat janë gjetur me shkelje gjatë kontrollit të ushtruar në muajt korrik dhe gusht. "Në zbatim të planit operacional për kontrollin e produkteve energjetike, Departamenti i Analizave dhe Aposteriorit në DPD ka kryer kontroll për: 8 magazina të lira për karburantet me vendndodhje në Porto Romano, Lezhë dhe Vlorë; 4 magazina të lira për produktin gaz i lëngshëm natyror me vendndodhje në Vlorë dhe Porto Romano si edhe 3 rafineritë e përpunimit të naftës bruto në Fier, Ballsh dhe Elbasan. Kontrolli u krye për periudhën 2018 - deri në gusht 2019 dhe konsistoi në krahasimin e të dhënave të sistemit informatik doganor, matjeve fizike të vitit 2018 me gjendjet e matjeve fizike të kryera nga grupi i kontrollit, duke shtuar veprimet doganore të periudhës në kontroll", vuri në dukje drejtori i Doganave.
MASAT Ndërkohë, krahas kompanive, masa janë marrë edhe ndaj doganierëve. "Jemi të ndërgjegjshëm që lufta ndaj informalitetit kërkon edhe analizimin dhe evidentimin e faktorëve të brendshëm, që kanë ndikuar në zhvillimin e këtij fenomeni, si dhe marrjen e masave dhe nxjerrjen e përgjegjësive për çdo individ apo strukturë të institucionit. Për sa më sipër, bazuar në mangësitë e evidentuara, përveç penalizimit të subjekteve ka nisur procesi i verifikimit të përgjegjësive brenda administratës doganore. Aktualisht janë liruar nga detyra 5 doganierë mbikëqyrës, janë thirrur në komisionin disiplinor 9 doganierë të tjerë", shtoi Gjokuta, i cili bëri të qartë se do të ketë zero tolerancë ndaj informalitetit dhe çdo operatori që do rezultojë me parregullsi. Aksioni antiinformlitet nisi në fillim të muajit korrik dhe deri në fund të këtij viti pritet që të kalojnë në sitë 6200 biznese. Sa u takon penaliteteve, krahas gjobave, abuzuesit do të përballen edhe me pezullim të aktivitetit.