ISH- PRONARET

Kompensimi, paratë për 25 mijë emra me skemën e re

Agjencia e Pronave publikon listën e 25 mijë dosjeve me vendime të ‘ 93- 2014. Kompensimi me formulën e re, vlera jo më shumë se 10 milionë lekë

Përcaktimi i vlerës së tokës u krijon mundësi pronarëve që të aplikojnë. Janë më shumë se 25 mijë dosje me vendime 1993- 2014, të vlerësuara me formulën e re.

Gazeta vijon edhe sot me publikimin e listës së pronarëve, që iu është llogaritur fatura. Për ata të cilët nuk ka ende një vlerë, mundësia që u mbetet është Gjykata. Ndërkohë që ka edhe një numër të konsiderueshëm familjesh, të cilat janë konsideruar të kompensuara, e që praktikisht dalin pa marrë asgjë nga ky proces i ri që ka nisur pas ndryshimeve ligjore. Sa u takon dokumenteve që duhet të dorëzohen për aplikimin, ato janë: konfirmim nga Hipoteka mbi gjendjen juridike të pronës që kompensohet, deklaratë noteriale, përmes së cilës subjektet vetëdeklarojnë nëse vendimi përfundimtar i kompensimit apo vlerësimi i tij është ankimuar apo jo në rrugë gjyqësore, dëshmi trashëgimie nëse ka ndryshuar rrethi i trashëgimtarëve, prokurë e nënshkruar nga të gjithë trashëgimtarët e ligjshëm, numër llogarie bankare si edhe deklaratë noteriale, përmes së cilës subjektet vetëdeklarojnë nëse kanë përfituar apo jo nga dispozitat për ndarjen e tokës bujqësore, si edhe dokument identifikimi. Me skemën e re, pronarëve iu lind e drejta të kompensohen financiarisht. Ata mund të marrin vetëm 20% të vlerës së faturës, por jo më shumë se 10 milionë lekë të rinj. Për pjesën e mbetur do të kompensohen nga fondi i tokës që ATP disponon.