Basha kërkon hapjen e negociatave: Më shumë kontroll mbi qeverinë
"Duhen zgjedhje të ndershme, nën një qeveri tranzitore"
Kryetari i Partisë Demokratike, Lulzim Basha, kërkoi dje hapjen e negociatave të Shqipërisë me Bashkimin Europian.
Kryedemokrati po merr pjesë në Asamblenë Politike të Partisë Popullore Europiane, që po zhvillon punimet në Bruksel, ku u takua me përfaqësues të partive anëtare të PPE- së, drejtues të politikës së jashtme dhe të zgjerimit në Parlamentin dhe Komisionin Europian, si dhe Parlamentet e vendeve anëtare. Lideri i opozitës ka kërkuar mbështetjen e tyre për hapjen e negociatave për Shqipërinë, si garanci, sipas tij, për të ndërtuar në Shqipëri një shtet demokratik, me pushtete të ndara, ku të garantohet vota e lirë. Sipas Bashës, zgjidhja e krizës politike në Shqipëri vjen nga zgjedhje të lira dhe të ndershme, nën mbikëqyrjen e një qeverie tranzitore. "Hapja e negociatave është e rëndësishme, pasi do të sjellë një mbikëqyrje të shtuar nga BE për të ndihmuar në ndarjen e politikës nga krimi, i cili sot ka kapur shtetin dhe për të penguar kandidimin e personave me rekorde kriminale, siç demonstrojnë rasti i Shkodrës dhe Vorës, ku është provuar tashmë se dy të inkriminuar u caktuan të kandidonin për bashkitë. Shqipëria sot ka një krizë të thellë politike, institucionale dhe ekonomike. Zgjidhja janë zgjedhjet e lira dhe të ndershme, të mbikëqyrura nga një qeveri tranzitore", tha Basha. Punimet e Asamblesë Politike të PPE- së do të vazhdojnë dhe gjatë ditës së nesërme, ku në axhendën e diskutimit do të jenë sfidat me të cilat përballet Evropa aktualisht dhe përgatitjet për Kongresin e PPE- së, i cili këtë vit mbahet në Zagreb.
LOBIMI Kryetari i Partisë Demokratike të opozitës, Lulzim Basha, ka lobuar edhe më herët për hapjen e negociatave të Shqipërisë me Bashkimin Europian. Kohë më parë, ai ishte në Berlin ku mori pjesë në një takim me Komisionin për Çështjet Europiane në Bundestagun gjerman. Kryedemokrati Basha edhe aty ka vënë theksin në rëndësinë e hapjes së negociatave me Shqipërinë, duke thënë se një vendim i tillë nga BE do të shtojë kontrollin ndaj qeverisë, si dhe do të japë rezultate në luftën ndaj krimit dhe korrupsionit. "Shqetësimet kryesore të grupit CDU- CSU kanë të bëjnë me luftën kundër drogës, me luftën kundër korrupsionit dhe Reformën në Drejtësi", është shprehur Basha. Sipas tij, është "Detyrë e vështirë të bindim këtë komision për hapjen e negociatave, proces i cili do të jetë një mjet shtesë dhe presioni për të rritur luftën kundër krimit, drogës, korrupsioni dhe për të mundësuar zbatimin e vërtetë të Reformës në Drejtësi, të pakapur politikisht", shkruante Basha në "Facebook" pas takimin në Bundestag.