Guvernatori Sejko: Zhvillimi i vendit, pozitiv
“Rol, nismat e BSH dhe politikat monetare stimuluese”
Nismat e ndërmarra nga Banka e Shqipërisë për përmirësimin e kreditimit, reduktimin e kredive me probleme apo zgjerimit të tregut financiar janë reflektuar në ecurinë ekonomike. Gjatë një takimi me përfaqësuesit e Bankës Evropiane për Rindërtim dhe Zhvillim ( BERZH), Guvernatori Gent Sejko vuri në dukje se pavarësisht luhatjeve që vijnë nga sektorë të caktuar, zhvillimi i vendit mbetet në një trend pozitiv, duke siguruar rritje të punësimit, përmirësim të shëndetit financiar të sektorit publik dhe privat, si dhe një trend rritjeje të presioneve të brendshme inflacioniste. “Ky trend zhvillimesh pasqyron si efektet pozitive që ka sjellë politika jonë monetare stimuluese, ashtu dhe efektet e nismave të ndryshme që Banka e Shqipërisë ka ndërmarrë në drejtim të reduktimit të kredive me probleme, të përmirësimit të ambientit të kreditimit, të përmirësimit të kuadrit mbikëqyrës e rregullator dhe përafrimit të tij me standardet e BE- së, si dhe në drejtim të rritjes së formalizimit dhe zhvillimit e zgjerimit të mëtejshëm të tregut financiar”, theksoi Sejko. Në fokus të takimit me BERZH ishte diskutimi i draftit të Strategjisë së Zhvillimit të Shqipërisë për vitet 2020- 2025. BERZH garantoi mbështetje në ekonomi, në funksion të zhvillimit të mëtejshëm të infrastrukturës dhe forcimit të klimës së biznesit, inkurajimin e një përfshirjeje më të gjerë të shtresave ekonomike e sociale, nëpërmjet rritjes së aksesit në financë dhe zhvillimit të mëtejshëm të dijeve, si edhe diversifikimin e mëtejshëm të burimeve të energjisë, rritjen e eficiencës dhe qëndrueshmërisë së përdorimit të saj. Ndërsa vlerësoi rolin që BERZH ka dhënë ndër vite, Guvernatori konsideroi po ashtu me rëndësi nevojën e përmirësimit të gjithanshëm të infrastrukturës dhe të klimës së biznesit, si dhe nevojën e mbështetjes së zhvillimit të sektorëve, të cilët ofrojnë potenciale ende të pashfrytëzuara zhvillimi, të tilla si turizmi, energjia, dhe agroindustria.