Do kontrollojë drejtësinë e re, vonohet ngritja e ILD
Juristët e interesuar kanë afat deri në 20 shtator të kandidojnë
Ngritja e Inspektoratit të Lartë të Drejtësisë do të bëhet vetëm pasi në garë të jenë të paktën 5 kandidatë.
Ky ishte vendimi i Këshillit të Emërimeve në Drejtësi, që pezulloi dje procesin dhe hapi sërish garën për në ILD. Inspektorati do të kontrollojë punën e drejtësisë së re dhe si institucioni që qëndron në krye të hierarkisë së organeve të reja të krijuara nga Reforma në Drejtësi, duhet të kishte filluar punën rreth 3 vite më parë. Mungesa e kandidatëve detyroi KED- në që të hapë garën dhe t'u lërë kohë të interesuarve deri në 20 shtator të dorëzojnë dokumentet për kandidim. "Pas shqyrtimit të gjendjes lidhur me ecurinë e procedurës së verifikimit të kandidaturave për vendin vakant të Inspektorit të Lartë të Drejtësisë, duke konstatuar se janë 4 kandidatë të lejuar për kandidim, në zbatim të ligjit, Këshilli i Emërimeve në Drejtësi vendosi: Pezullimin e procedurës së verifikimit të kandidaturave për plotësimin e vendit vakant të Inspektorit të Lartë të Drejtësisë. Shpalljen e procedurës së thirrjes për paraqitjen e kandidaturave për plotësimin e vendit vakant të Inspektorit të Lartë të Drejtësisë. Paraqitja e interesit për kandidim, së bashku me dokumentacionin shoqërues, depozitohet në zyrën e Këshillit të Emërimeve në Drejtësi, pranë Gjykatës së Lartë, deri në datën 20 Shtator 2019", njoftoi dje KED.
FUNKSIONI ILD
Duke iu referuar ligjit për organet e reja të drejtësisë, detyrat dhe kompetencat e Inspektoratit të Lartë të Drejtësisë, përfshijnë: Verifikimin e ankesave të personave fizikë ose juridikë ndaj gjyqtarëve, prokurorëve, anëtareve të Këshillit të Lartë Gjyqësor dhe anëtarëve të Këshillit të Lartë të Prokurorisë. Gjithashtu, Inspektorati nis hetimin administrativ me nismë rreth shkeljeve të pretenduara disiplinore të gjyqtarëve, prokurorëve, anëtareve të Këshillit të Lartë Gjyqësor dhe anëtarëve të Këshillit të Lartë të Prokurorisë. Bën inspektime të gjykatave dhe të zyrave të prokurorisë për të kontrolluar mënyrën e organizimit dhe të funksionimit të tyre.
KANDIDATËT
Me konfirmimin e Marsida Xhaferllarit, ish- kryeinspektore e KLD, u plotësuan katër kandidatë për garën në ILD. Gjyqtari Artur Malaj është kandidati tjetër i konfirmuar. Mes disa dyshimeve për pasurinë, Malaj arriti të kalonte kontrollin e trefishtë të KPK- së, në gusht të vitit që lamë pas, ndërsa vendimi është ankimuar nga Komisioneri Publik, i cili kërkon shkarkimin e tij. Edhe Artur Metani është konfirmuar nga KED për vazhdimin e garës. Në tetor të 2018- ës, ai u emërua Avokat i Përgjithshëm i Shtetit me urdhër të Kryeministrit, ndërsa ka një karrierë të gjatë në administratë. Më herët ka qenë këshilltar ligjor në kabinetin e Presidentit të Republikës, të Presidentit Meidani, Presidentit Moisiu dhe Presidentit Topi. Ndërsa nga viti 2013, është emëruar Drejtor i Njësisë së Legjislacionit, Monitorimit të Programeve dhe Kontrollit të Brendshëm, në Kryeministri. Kandidate e konfirmuar nga KED për të vazhduar garën për në ILD, është edhe avokatja Eris Hysi. Ligji parashikon se për ngritjen e ILD, në garë duhet të jenë të paktën 5 kandidatë që do të vlerësohen nga KED me një sistem pikëzimi. "Këshilli i Emërimeve në Drejtësi ( KED) përzgjedh paraprakisht 5 kandidatë për ILD, nga radhët e juristëve të spikatur me jo më pak se 15 vjet përvojë pune në profesion. Pesë kandidatët renditen nga KED sipas meritës. Kuvendi zgjedh Inspektorin e Lartë të Drejtësisë, midis 5 kandidatëve të përzgjedhur nga KED, me votat e 3/ 5 të të gjithë anëtarëve. Në rast se Kuvendi nuk arrin shumicën prej tre të pestave për asnjë prej kandidatëve, kandidati që është renditur i pari nga KED, shpallet i emëruar", parashikohet në ligj.