Dështon sërish gjyqi ndaj Emiliano Shullazit
Grupi është dënuar me 55 vite burg në Shkallë të Parë për disa akuza
Gjykata e Apelit për Krime të Rënda shtyu për të gjashtëmbëdhjetën herë gjyqin ndaj Emiljano Shullazit dhe 4 të pandehurve të tjerë, duke vazhduar "sagën" e dështimeve. Raportet mjekësore të dorëzuara nga dy prej avokatëve mbrojtës, Vladimir Meçi dhe Elton Domi, bën që Gjykata ta konsiderojë të ligjshëm mungesën e tyre dhe shtyjë procesin për në 23 shtator. Emiliano Shullazi nuk ishte i pranishëm në seancën e kësaj së hëne, ku u paraqitën vetëm 4 të pandehurit, Gilmando Dani, Endrit Qyqa, Endrit Zela dhe Blerim Shullazi. Kujtojmë se pas 16 seancash të zhvilluara që prej janarit të këtij viti, Apeli i Krimeve të Rënda nuk i ka dhënë zgjidhje këtij procesi, ndër më të përfolurit mediatikisht. Por duket se zvarritjet e procesit do të vazhdojnë në kushtet kur ashtu si disa gjyqtarë të tjerë më parë, që kanë dhënë dorëheqjen pasi kanë gjykuar Vollgën, edhe gjyqtari i fundit i deleguar nga KLGJ, Arben Vrioni, gjendet në të njëjtat kushte. Gjatë 5 seancave të para, shkak u bë mungesa e avokatëve mbrojtës. Pas këtij momenti, shkarkimi i drejtuesit të trupës gjykues, gjyqtarit Fehmi Petku dhe largimi i një prej anëtarëve të trupit gjykues për shkak të konfliktit të interesit bëri që procesi të fillonte nga e para. Ndërkohë, ka qenë Këshilli i Lartë Gjyqësor, që plotësoi trupin gjykues duke deleguar gjyqtaren Valdete Hoxha, e cila dha dorëheqjen për shkak të konfliktit të interesit. Seancën e parë u bë e ditur se gjyqtarja Valdete Hoxha është zëvendësuar në trupin gjykues nga gjyqtarja Etleva Temo, ndërsa duket se edhe gjyqtari Arben Vrioni është në të njëjtat kushte.
DËNIMI Në përfundim të shqyrtimit gjyqësor, Gjykata e Shkallës së Parë dënoi me 14 vite burg Emiljano Shullazin. Ndërkohë, i konsideruari si krahu i djathtë i Shullazit, Gilmando Dani, u dënua me 11 vite burg. Sipas Prokurorisë, ai ka qenë mbështetës në veprat penale të kryera dhe një nga kryesorët, si dhe njeri i afërt i Emiljano Shullazit. Endrit Qyqa dhe Endrit Zela u dënuan nga 10 vite burg secili. sipas Prokurorisë, dy të pandehurit kanë qenë në rolin e personave që kanë ndihmuar në arritjen e qëllimit kriminal. Në fund, Gjykata dha 9 vite burg për Blerim Shullazin, i cili akuzohej për gjobëvënien ndaj Zakës dhe armëmbajtje pa leje.