Mbretëresha britanike vulos ligjin që pengon ikjen nga BE pa marrëveshje
Mbretëresha Elizabeth II ka vulosur ligjin që detyron qeverinë e Kryeministrit Boris Johnson të kërkojë te Bashkimi Evropian një shtyrje të Brexit, në rast se nuk arrihet një marrëveshje deri në afatin aktual të 31 tetorit. Njoftimi u bë në mesditën e së hënës nga Dhoma e Lordëve në Britani. “Projektligji mbi tërheqjen e BE- së ka marrë pëlqimin mbretëror”, ka njoftuar Dhoma e Lartë britanike në llogarinë zyrtare në “Twitter”. Miratimi i mbretëreshës ishte etapa e fundit e nevojshme për hyrjen në fuqi të këtij teksti që synon të pengojë një Brexit pa marrëveshje. Ndërkohë, kryetari i Parlamentit britanik, John Bercow, në një fjalim emocionues para deputetëve, ka paralajmëruar se do të japë dorëheqje në rast të zgjedhjeve të parakohshme ose më 31 tetor. Sipas Bercow, 10 vjetët e tensionuara në këtë detyrë po i afroheshin fundit dhe ka qenë nder i madh dhe privilegj që ka shërbyer në këtë post për një dekadë. Në rast se nuk ka zgjedhje të parakohshme, Bercow do të largohet nga detyra më 31 tetor. Gjatë javëve të fundit, kreu i Dhomës së Ulët të Parlamentit britanik është kritikuar nga përkrahësit e Brexit, se po lehtëson përpjekjet e deputetëve që të kundërshtojnë largimin nga BEja pa marrëveshje. Qëkur mori drejtimin e Dhomës së Ulët të Parlamentit, në vitin 2009, Bercow është kritikuar po ashtu që nuk ka punuar shumë rreth akuzave për ngacmime seksuale në Parlament. Konservatorët nuk kanë dashur ta ripropozojnë për rizgjedhje në këtë post, në rast vote të parakohshme. Sipas traditës, kryetari i ri vendoset mes dy partive kryesore. Nëse kjo traditë vazhdon edhe kësaj here, kryetari i radhës mund të jetë deputet nga Partia Laburiste. Kandidimin për postin e kryetarit e kanë paralajmëruar laburisti Chris Bryant dhe konservatorja Eleanor Laing.