Trafik kokaine, kanabisi dhe laborator droge, 57 të arrestuar pas 3 vite hetim
Drejtori i Përgjithshëm i Policisë: Hetimet nisën në vitin 2016, u arrestuan 57 persona, u shpallën në kërkim 8 të tjerë
Katër grupe kriminale me aktivitet kryesor trafikimin e lëndëve narkotike drejt vendeve të BE- së u goditën dje gjatë një operacioni të realizuar nga Policia e Shtetit dhe Prokuroria e Krimeve të Rënda.
Rezultatet e këtij operacioni u prezantuan dje nga Drejtori i Përgjithshëm i Policisë, Ardi Veliu, dhe prokurori që ka drejtuar hetimet, Vladimir Mara, të shoqëruar nga drejtori i Policisë Kriminale, Tonin Vocaj. Gjatë konferencës për shtyp, Ardi Veliu tha se është finalizuar operacioni policor i koduar "Limit", si rezultat i të cilit u shkatërruan 4 grupe kriminale në fushën e narkotikëve. Në kuadër të operacionit janë arrestuar 57 persona, si dhe janë shpallur në kërkim 8 të tjerë. Sipas Veliut, gjatë operacionit janë sekuestruar sasi të ndryshme kanabisi, kokaine, laboratorë për kultivim të bimëve narkotike, fara kanabis, fishekë luftarakë, si dhe janë asgjësuar parcela me bimë narkotike të kultivuara. "Policia e Shtetit, në përmbushje të prioritetit kryesor, atë të parandalimit, evidentimit dhe goditjes së veprimtarisë kriminale në fushën e narkotikëve, ka vijuar operacionet e pandërprera në bashkëpunim me agjencitë ligjzbatuese brenda dhe jashtë vendit dhe me policitë homologe të vendeve të rajonit e më gjerë", tha Ardi Veliu.
OPERACIONI
Në funksion të një hetimi që ka nisur prej vitit 2016, Task Forca Speciale Qendrore në Departamentin e Policisë Kriminale në bashkëpunim me Drejtoritë Vendore të Policisë Tiranë, Durrës, Fier, Vlorë, Gjirokastër, Korçë, Drejtorinë e Forcës së Posaçme Operacionale dhe FNSH- në, nën drejtimin e Prokurorisë së Krimeve të Rënda, finalizoi operacionin "Limit". Ky operacion ishte nisur më parë, në bashkëpunim dhe koordinim të plotë me strukturat e Policisë greke. Ky operacion u krye në funksion të procedimit penal të regjistruar në vitin 2016, për veprën penale "Trafikimi i narkotikëve", kryer në bashkëpunim. Operacioni ka vijuar mëngjesin e djeshëm në disa qarqe të vendit, ku u angazhuan rreth 300 forca policore. Këtyre grupeve kriminale së fundmi i është sekuestruar rreth 120 kg lëndë narkotike e llojit kanabis, 4 kg kanabis në formë çokollate, 1.1 kg kokainë, bimë narkotikë të kultivuara, 3800 fara kanabis, një laborator për kultivim të bimëve narkotike me ndriçim artificial, telefona celularë dhe disa automjete.
HETIMI
Gjatë periudhës së hetimit, 2016- 2019, është shkëmbyer në kohë reale informacion me partnerët e Policisë shqiptare nëpërmjet SELEC- ut për aktivitetin kriminal të personave të përfshirë në këto grupe kriminale dhe si rezultat, nga autoritetet policore greke janë arrestuar 34 persona, të cilët ushtronin aktivitetin kriminal të trafikimit dhe shpërndarjes të narkotikëve. Policia greke, gjatë operacioneve të kryera, ka sekuestruar rreth 200 kg kanabis, 3.5 kg kanabis në formë çokollate dhe 1.3 kg kokainë. Gjatë hetimit u bë e mundur të dokumentohej aktiviteti kriminal edhe i 31 personave të tjerë në Shqipëri, duke u finalizuar me ekzekutimin e masave të sigurisë për 23 prej tyre, ndërsa 8 të tjerë janë shpallur në kërkim. Aktiviteti kriminal i këtyre grupeve realizohej duke siguruar fara të bimës narkotike kanabis në Holandë, të cilat kalonin tranzit fillimisht drejt Greqisë dhe më pas në Shqipëri, ku dhe kultivoheshin. Lënda narkotike kanabis e prodhuar trafikohej në Greqi, Turqi dhe në vende të tjera të BE- së, ku këto grupe kriminale kishin ngritur rrjetin e vet të shpërndarjes së lëndëve narkotike të llojit kanabis e kokainë.