Rama e Veliaj, në shkollën e rindërtuar “Servete Maçi”: 200 shkolla të reja në gjithë vendin

Kryeministri Edi Rama dhe kryebashkiaku i Tiranës zgjodhën të uronin fëmijët nga shkolla e rindërtuar nga themelet “Servete Maçi”. Sipas kreut të qeverisë, kjo është e 200 në radhën e objekteve arsimore të rindërtuara me kushte optimale për nxënësit. “Është më rëndësi të thuhet sot, në këtë ditë të parë të vitit të ri shkollor, se përtej infrastrukturës që po transformohet në mënyrë rrënjësore, ne numërojmë afro 200 shkolla në gjithë Shqipërinë, që janë rindërtuar apo ndërtuar nga e para, të cilave do t’u shtohen të tjera në vijim. Kam parasysh këtu grupin e 17 shkollave të reja të Bashkisë së Tiranës, që do të realizohen përmes një projekti të mbështetur financiarisht nga qeveria dhe të çuar përpara me një ambicie të re”. Ndërsa kryebashkiaku Veliaj u njohu meritën për ndërtimin e kësaj shkollave, atyre që nuk u dorëzuan përpara oligarkëve që, ashtu si shkollën ‘ Kosova’, dëshironin ta bënin pallat. “Meritën më të madhe e kanë prindërit, ata që një mandat përpara skuadrës sime, midis skuadrës sime dhe skuadrës së Edit, në fakt, luftuan që kjo dhe shkolla ‘ Kosova’ të mos ktheheshin në terrene pallatesh. Është shumë kollaj të ngresh duart lart dhe të thuash kjo është e rrënuar, çfarë na duhet. Por do shumë më shumë guxim të thuash se nga rrënojat mund të lindë diçka e re dhe e bukur”. Veliaj nënvizoi se Bashkia e Tiranës ka bërë të mundur që çdo fillim të vitit të ri të hapë një shkollë të re, ndërsa theksoi se viti i ardhshëm do jetë akoma më i veçantë, pasi do të hapin dyert për nxënësit 17 shkollat e reja që do të ndërtohen në partneritet me privatin.