Tapitë me ligjin 7501, Komisioni i Venecias mbërrin sot në Tiranë
Delegacioni do të takohet me përfaqësues të 4 ministrive. Si ndryshojnë procedurat e regjistrimit të tokës me ligjin e ri
Ligji i ri i pronave do të duhet të kalojë në "filtrin" e Komisionit të Venecias. Qëndrimi zyrtar mbi këtë draft pritet të jepet në seancën e radhës, që do të mbahet në muajin tetor.
Por sot, një delegacion i Komisionit do të vizitojë Tiranën. Gjatë qëndrimit dyditor do të zhvillohen takime me përfaqësues të 4 ministrive, përkatësisht Ministrisë së Drejtësisë, Ministrisë së Brendshme, Ministrisë së Financave dhe Ministrisë për Europën dhe Punët e Jashtme. Takime do të zhvillohen po ashtu edhe me përfaqësues të gjyqësorit dhe shoqërisë civile. "Në kuadër të përgatitjes së mendimit mbi projektligjin ' Për përfundimin e proceseve kalimtare në Republikën e Shqipërisë', një delegacion i Komisionit të Venecias do të vizitojë Shqipërinë nga 18 deri më 19 shtator 2019", komunikohet në faqen zyrtare të Komisionit. LIGJI NË VENECIA Pas muajsh të tërë zvarritjesh, pala shqiptare dërgoi për mendim në "Venecia" ligjin e ri të pronave. Në fillim të muajit gusht, Komisioni pranoi kërkesën e palës shqiptare për të marrë në shqyrtim draftin. Por vonesat e shkaktuara, nga hedhja për diskutim e ligjit, deri te diskutimet në komisionet parlamentare e më tej dërgimi në Venecia, nuk ka kaluar pa kosto. Ky ngërç i krijuar ka sjellë bllokim të procesit, duke shkaktuar amulli sa u takon çështjeve të pronësisë. Mbetet të shihet qëndrimi që Komisioni do të mbajë për të kuptuar edhe fatin që do të ketë ky ligj.
LIGJI I RI Ligji "Për përfundimin e proceseve kalimtare të pronësisë" është pjesë e reformës së qeverisë dhe parapriu krijimin e Agjencisë Shtetërore të Kadastrës. Në më shumë se 70 nene të tij përcaktojnë procedurat për regjistrimin e tokave të ndara me ligjin 7501, procedurat për oborret në përdorim dhe fshatrat turistike. Po ashtu, nëpërmjet tij synohej të nistë një fazë e re verifikimi në terren për të gjitha tapitë e ndara deri më tani. Të gjitha këto kompetenca do të ishin "duart" e një institucioni të vetëm, siç është Agjencia e Kadastrës. Zyrtarisht është thënë se mbi 80 për qind e territorit është e paregjistruar, kjo pasi të dhënat nuk janë konfiguruar në sistem. Por edhe ato regjistrime të kryera do të verifikohen, duke qenë se janë konstatuar parregullsi.
PAJISJA ME TAPI Në ligjin e ri përcaktohen hapat që do të ndiqen deri në pajisjen e fermerëve me certifikatën e pronësisë. Për regjistrimin përfundimtar do të kërkohet përmbushja e 6 kritereve. Së pari, duhet që fermerët, të cilët nuk e kanë certifikatën e pronësisë, të paraqesin kërkesë pranë bashkisë apo njësisë administrative ku banojnë për pajisjen me AMTP. Kërkesa nuk konsiderohet e mirëqenë nëse nuk bëhet nga përdoruesi faktik, çka do të thotë se nuk mund të pretendosh pronësinë për një pronë, të cilën nuk e përdor. Së treti, duhet që toka të mos u takojë zërave "rëra bregdetare ose "plazhe. Po ashtu, të mos jetë kaluar në pronësi të të tretëve, si dhe të mos jetë pjesë e fondit për kompensimin fizik të ish- pronarëve. Së fundmi, duhet që në hapësirën e pretenduar të mos jetë ndërtuar pa leje, qoftë kjo nga të tretë, qoftë edhe prej familjes kërkuese. Pra, toka bujqësore duhet të ketë ruajtur identitetin si e tillë pa u zënë nga ndërtimet. Qytetarët, sipas ligjit, do të kenë deri në 90 ditë afat për t'u paraqitur pranë njësive administrative për të bërë regjistrimin e pronave që kanë në posedim të përfituara me anë të ligjit 7501. Sa i takon dokumentacionit që duhet të dorëzohet përveç kërkesës për pajisjen me aktin e përdorimit nga komisionet e ndarjes së tokës, kërkohet edhe planvendosja e secilës ngastër që kanë në përdorim, certifikatë familjare, të lëshuar nga zyra e gjendjes civile e bashkisë, ku të pasqyrohet numri i anëtarëve të familjes përfituese, në favor të të cilit do të lëshohet akti i marrjes së tokës në pronësi, sipas gjendjes më 1 gusht 1991, si edhe dokumentacionin që vërteton se janë përfitues, si rezultat i lëvizjes nga qendrat e tyre të banimit.