Zbardhet dosja me shkeljet e kreut të Kadastrës, Braçe: Drejtori u shantazhua
“E kërcënuan brutalisht pak para arrestimit: Ik nga Durrësi dhe ik tani. E arrestuan dhe e mbajnë në burg vetëm për ta hequr”
Në një deklaratë të pazakontë për mediat, që ka zgjatur më shumë se 24 minuta, zv. kryeministri, Erion Braçe, ka lëshuar akuza të forta ndaj opozitës për ndikim mbi prokurorin Arjan Ndojin, që po heton ish- drejtorin e Kadastrës në Durrës.
Të korruptuar, të lidhur me Partinë Demokratike dhe grupe kriminale. “Di gjithçka çfarë keni komunikuar me personazhet e kësaj historie”, iu hakërrye Braçe drejtuesve të opozitës, duke mos përmendur një emër të përveçëm. Zv. kryeminsitri, duke lajmëruar se të gjitha dokumentet që ka në dispozicion do t’ua vendosë organeve të vetingut, shtoi se, për disa persona, duke pasur parasysh prokurorin Ndoji, nuk ka nevojë për veting, por vetëm për përgjim për të zbuluar korrupsionin dhe abuzimin e kryer prej tij. Braçe, në fjalën e tij, u shpreh se hetimet kanë nisur nga kallëzimi i një personi që nuk ka lidhje me çështjen, duke thënë se bëhet fjalë për një kallëzim specifik për prokurorin Ndoji drejtpërdrejtë. “Kompania ‘ Lura’ shpk ka ndërtuar me çdo leje të mundshme me marrëveshje dhe kontrata legale, kompleksin Lura 3. Ka aplikuar për të marrë sipas ligjit çdo leje dhe i është shërbyer sipas ligjit, sipas lejeve të marra më herët. Nuk ka lidhje as me grabitje tokash e pronash në Gjirin e Lalëzit as me legalizime objektesh që nuk janë ndërtuar kurrë më parë. As investitori, as ndërtuesi, as pronarët e truallit nuk kanë kallëzuar për procedurën e ndjekur në zyrat e shtetit. Asnjërit prej tyre nuk i është shkaktuar ndonjë dëm, qoftë fizik, qoftë monetar. Kush ka kallëzuar dhe a është i dëmtuar ai? Ka kallëzuar një njeri anonim, pa lidhje fare me çështjen. Kallëzimi i është drejtuar specifikisht këtij prokurori. Unë ia kam dalë ta kem këtë kallëzim që prokurori ia fshehu dje gjykatës. Drejtuar Arjan Ndojës, madje lëvdohet ky prokuror në këtë kallëzim, janë 5 faqe. Kallëzuesi nuk përmend në asnjë rresht të tij drejtorin e ASHK- së. Ky prokuror ka marrë kallëzim nga shtetas anonim, por njohës i procedurës së ASHK- së ku akuzohen nëpunës të tjerë, por jo drejtori i ASHK- së i vënë nën akuzë nga ky prokuror”, u shpreh zv. kryeministri, duke mohuar faktin se ka pasur kallëzim në Polici për këtë rast. Braçe, duke folur për çështjen, bëri të ditur se Liridon Pula gjatë kryerjes së detyrë është shantazhuar dhe kërcënuar thuajse çdo ditë gjatë muajit shtator. “E shantazhuan thuajse çdo ditë me shprehjen tipike prej mafiozi: Sa të kushton vendi i punës ty? Dhe herë tjetër, brutalisht, pak ditë para arrestimit: Ik nga Durrësi dhe ik tani. E arrestuan dhe e mbajnë në burg vetëm për ta hequr nga Durrësi. Në Durrës, prokurorë e gjykatës, herë për interesa të tyre e herë për interesa të tjera të sipërmarrësve apo banditëve që sillen si sipërmarrës, politikanë gjithfarësh, duan akses përtej ligjit në Kadastër. Duan të bëjnë politikën e kuadrit”, deklaroi Braçe. Zv. kryeministri, duke bërë të ditur se familjarët e tij nuk kanë asnjë lidhje gjaku me të arrestuarin Liridon Pula, paralajmëroi se do të dërgojë në Gjykatë për shpifje ish- deputetin e PD- së, Enkelejd Alibeaj. “Talebani që artikuloi këtë dje dhe ngriti mbi këtë shpifje një episod të tërë korrupsioni, do të vijë ta provojë në gjykatë dhe ky do të jetë fillimi për të dhe racën e tij të talebanëve politikë në përballjen për çdo gjë të bërë në këtë vend”, u shpreh zv. kryeministri në deklaratën e tij para gazetarëve në godinën e Kryeministrisë.