Sot Kosova voton, ja premtimet e kandidatëve për kreun e qeverisë
Osmani, Kurti, Veseli, Limaj e Haradinaj, në garë për qeverinë e re
Kosova sot voton në zgjedhjet e jashtëzakonshme, pas një fushate dhjetëditore dhe një dite heshtjeje zgjedhore për të gjitha partitë dhe koalicionet me pesë kandidatët për Kryeministër.
Në zgjedhje marrin pjesë 25 subjekte politike, të cilat garojnë për 120 vende në Kuvendin e Kosovës. Komisioni Qendror i Zgjedhjeve ka certifikuar listën përfundimtare të votuesve, me 1 milion e 937 mijë e 868 votues, të cilët kanë mundësi të votojnë në 2,547 vendvotime, me 895 qendra votimi. Presidenti i Kosovës, Hashim Thaçi, ka takuar të shtunën krerët e institucioneve të sigurisë e të drejtësisë, për t’u siguruar se gjithçka do të shkojë mbarë gjatë procesit. “Jam i sigurt se edhe këto zgjedhje do të jenë të lira e demokratike”, u shpreh Thaçi. Pas dorëheqjes së Haradinajt, Kosova po mban zgjedhje të jashtëzakonshme, ku pesë politikanë garojnë për postin e Kryeministrit të ri. Tubimet e fundit Osmani Kandidatja e Lidhjes Demokratike të Kosovës dhe gruaja e vetme në garë për Kryeministre, Vjosa Osmani, e ka mbajtur tubimin përmbyllës elektoral në Gjilan. Osmani tha se Kosova pohoi fuqishëm se ka vendosur ta lidhë fatin e vet me LDK- në dhe “është dëshmuar rilindja e frymës rugoviane”. Duke treguar prioritetet, Osmani tha: “Puna ime është që miliardat e asfaltit t’ia kthej arsimit e shëndetësisë. Puna ime është që mësuesve e shkollave t’u japim dinjitet… Ministrat e Qeverisë sime nuk do ta kalojnë mëngjesin në gjykata e pasditen në qeveri. Ata do të jenë shembull i punëve me duar të pastra”. Kurti Tubimi përmbyllës i fushatës së Lëvizjes Vetëvendosje, në Prishtinë, nisi me intonimin e himnit kombëtar nga sopranoja Besa Llugiqi. Albin Kurti, kandidat për Kryeministër nga Lëvizja Vetëvendosje, tha mes të tjerash se, “Për fitoren tonë ne nuk do t’i kemi borxh asnjë tajkuni e ambasade. Do t’ju kemi borxh vetëm juve e do t’ju shërbejmë pa pushim. Nuk jemi mbledhur këtu as për t’ju premtuar, as për t’ju gënjyer”, duke iu drejtuar mbështetësve që kishin dalë në tubim. Ai shtoi se si qeveri e re, do të gjejnë Kosovën në një gjendje shumë të rëndë. Veseli Edhe Partia Demokratike e Kosovës ka mbajtur tubimin mbyllës në Prishtinë, ku mesazhi më i fortë i kandidatit Kadri Veseli ishte: “Territori i Kosovës nuk do të cenohet”. Veseli ka premtuar luftë ndaj korrupsionit, krijimin e shanseve të barabarta, zhvillim ekonomik dhe krijimin e vendeve të punës, partneritetin që do ta ndërtojmë me Amerikën. I pranishëm në tubim ishte James Wharton, një prej figurave të Partisë Konservatore të Britanisë së Madhe. “Disa muaj më parë pata privilegjin të drejtoja fushatën e Boris Johnson për udhëheqjen e partisë sime. E mbështeta për shkak të vlerave të tij. Sot shoh po ato vlera të pasqyruara edhe në këto zgjedhje... Kjo është arsyeja pse jam këtu, për të mbështetur PDK- në dhe Kadri Veselin”, tha ai. Limaj Kreu i Nismës për Kosovën dhe kandidati për Kryeministër nga aleanca
Nisma- AKR- PD, Fatmir Limaj, ka thënë se si Kryeministër i ardhshëm do të udhëheqë dialogun ndërmjet Kosovës dhe Serbisë, pavarësisht kundërshtimit të Presidentit serb, Aleksandar Vuçiç. Tubimi i tij përmbyllës u mbajt në Prizren. “Vuçiç ka qenë koordinator i Sheshelit. Alarmi i tij për mos me drejtu dialogun është nder për mua, por i them se unë do të jem në tavolinë dhe do të nxjerr marrëveshjen që do Kosova”, tha Limaj. Në takim kreu i AKR- së, Pacolli, foli rreth programit të AKR- së dhe kontributin që kjo parti ka dhënë për Kosovën. Ai nuk përmendi asgjë lidhur me raportimet e mediave për takimin e tij me nënkryetarin e Listës Serbe, Milan Radoiçiç. Haradinaj Kreu i AAK- së dhe kandidati për Kryeministër nga ky koalicion, AAK- PSD, Ramush Haradinaj, e mbajti tubimin përmbyllës në Gjakovë, ku tha: “Kur ka zgjedh Gjakova, i ka ra mirë Kosovës dhe gjithë shqiptarëve. Kësaj here, Gjakova ka zgjedh Kosovën 100 për qind shtet, ka zgjedh koalicionin AAKPSD”. Haradinaj ka është ndalur te disa nga pikat, me të cilat krenohet për qeverisjen e tij, si FSK- në, Policinë, AKI- në, etj. Sa për raportin me Serbinë, Haradinaj tha se “kur e shohin fleksibilitetin e kreativitetin e Kosovës, rriten ambiciet edhe të Serbisë edhe të Bashkësisë Ndërkombëtare. Do të vijnë të na kërkojnë diçka tjetër e na thonë se duhet bërë kompromise të dhimbshme”, kur sipas tij, Kosova ka bërë deri tani shumë kompromise të dhimbshme.