Holanda, skeptike për negociatat me Shqipërinë
Kryeministri Rutte: Jemi të shqetësuar për progresin në Shqipëri
Kryeministri holandez, Mark Rutte, shprehu skepticizmin e qeverisë së tij për hapjen e negociatave me Shqipërinë. Ai vizitoi Berlinin me kabinetin e tij qeveritar për të biseduar mbi bashkëpunimin gjerman në fushën e mbrojtjes së klimës dhe zhvillimit të energjive të ripërtërishme. Por në konferencën e shtypit, bashkë me Kancelaren e Gjermanisë, Angela Merkel, ai u shpreh edhe në lidhje me hapjen e negociatave të BE- së me Shqipërinë e Maqedoninë e Veriut, ku u tregua skeptik sa u përket gjasave të Shqipërisë. I pyetur nëse Holanda do të japë përgjigje pozitive për hapjen e negociatave, Rutte u shpreh se kemi ende shumë shqetësime. "Ne, si shumë vende të tjera, ende jemi të shqetësuar - diçka më pak për Maqedoninë e Veriut dhe më shumë për Shqipërinë. Pyesim veten se sa përpara ka shkuar progresi në Shqipëri, dhe aty kemi më shumë shqetësime", tha Rutte. Kryeministri holandez Rutte e la hapur edhe kohën dhe mundësinë e nisjes së negociatave për Shqipërinë, derisa për fqinjët në Maqedonisë Veriore ishte më shpresëdhënës. "Për këtë, ne do të flasim në javët e ardhshme edhe me partnerët europianë, sepse jemi vërtet të shqetësuar, për masën e progresit të arritur. Maqedonia e Veriut ka arritur më shumë se Shqipëria dhe për këtë do të ketë ende bisedime". Media holandeze "De Telegraaf" raportoi dy ditë më parë qëndrimin e ministrit të Jashtëm, Stefan Blok, i cili edhe më herët ka konfirmuar të njëjtin qëndrim. "Shqipëria duhet të ndërmarrë hapa të mëtejshëm, veçanërisht në trajtimin e korrupsionit dhe përmirësimin e sundimit të ligjit. Për Maqedoninë e Veriut, rruga është më e hapur. Vendi ka ndërmarrë hapa konkretë. Sundimi i ligjit është drejt progresit, ndaj shohim mundësi për këtë vend", ka thënë ministri Block për "De Telegraaf". Ministri i Jashtëm holandez ka mbajtur të njëjtin qëndrim gjatë një takimi të Komisionit Parlamentar për Punë të Përgjithshme. Blok deklaroi se negociatat me Shqipërinë do të hapen, pasi të jenë përmbushur pesë kushte të vendosura nga Këshilli Europian në vitin 2018. Në 18 tetor, Këshilli Europian pritet të vendosë për hapjen e negociatave të pranimit me Shqipërinë dhe Maqedoninë e Veriut. Javën e kaluar nga Bundestagu gjerman kishte pasur lajme më të mira rreth çeljes së negociatave me BE- në për anëtarësimin e Shqipërisë në BE, e siç ishte paralajmëruar pas aprovimit të tyre, dritën e blertë e ka tani edhe qeveria gjermane për të dhënë aprovimin e saj.