Data e re për deklarimin, pensionistët që përfitojnë
Cilat janë kategoritë dhe mënyra për t'iu shmangur taksës së banesës. Procedura e vetëdeklarimit pranë pikave të UKT- së, tashmë edhe on- line
Shtyrja e afatit të vetëdeklarimit për taksën e ndërtesës u ka dhënë më shumë kohë qytetarëve për të kryer procesin pa u penalizuar, ndërsa kategorive përjashtuese për të mbledhur dokumentacionin e nevojshëm për t'iu shmangur detyrimit.
Në një thirrje të dytë drejtuar qytetarëve, drejtoria e Ujësjellës Kanalizimeve iu kujton atyre dateline- n e ri, 30 tetor, teksa nënvizon dokumentet që duhet të dorëzojnë ata që posedojnë një pronë të pahipotekuar. Në mungesë të certifikatës së pronësisë, mjafton një kontratë shitblerjeje, dhurimi a shkëmbimi, një akt privatizimi a vetëdeklarimi tek ALUIZNI apo qoftë rivlerësimin e fundit të pasurisë. Ndërkohë, UKT- ja ka punuar për t'iu ardhur në ndihmë edhe atyre që nuk mund ta bëjnë vetëdeklarimin fizikisht. Kështu, ata që nuk e kanë kryer ende për efekt kohe, nuk kanë më asnjë justifikim. Një opsion elektronik që gjendet lehtësisht në faqen e UKTsë jep mundësinë të kryeni procesin bashkë me përllogaritjen e vlerës që çdo qytetar duhet të paguajë nga viti 2020. "Nuk keni mundësi të shkoni pranë PIKA UKT për të kryer vetëdeklarimin për llogaritjen e taksës së ndërtesës? Tani çdo gjë është më e lehtë për ju, pasi këtë veprim mund ta kryeni online. Ndiqni hapat e saktë në plotësimin e formularit. Ju lutemi të tregoni kujdes në ngarkimin e dokumenteve sipas udhëzimeve përkatëse, në mënyrë që vetëdeklarimi të jetë i rregullt. Afati për të kryer këtë proces vijon deri më 30 tetor", thuhet në njoftimin e UKT- së. Kjo nuk vlen për kategoritë që përjashtohen nga detyrimi. Pensionistët kryefamiljarë dhe familjet që trajtohen me ndihmë ekonomike duhet t'i drejtohen gjendjes civile për të dorëzuar pesë dokumentet: certifikatë familjare, fotokopje të kartave të ID, kopje të librezës së ujit, faturë pagese e muajit të fundit nga UKT- ja dhe vërtetimin që trajtohet me pension ose asistencë. Njësitë administrative, pasi vërtetojnë dokumentet, i nisin në drejtorinë e Tatim Taksave të Bashkisë Tiranë. Është kjo e fundit, që fut në sistem listën e personave që nuk u takon të paguajnë për t'ua nisur UKT- së, që ekzekuton zerimin e taksës në faturën mujore. Bashkë me taksën që pritet të hyjë në fuqi vitin e ardhshëm, në total janë katër taksa e tarifa vendore, për të cilat Ujësjellësi shërben si agjent tatimor, duke vjelë mbi 670 lekë në muaj, për çdo familje kryeqytetase, veç sasisë së ujit të shpenzuar. Ndaj, familjet që iu përkasin një prej kategorive në tabelën përbri, duhet të nxitojnë në përfundimin e procesit pranë zyrave të Ujësjellësit dhe Gjendjes Civile, deri në fundin e muajit.