MIGRENA, SI MUND TË PARANDALOJMË SHFAQJEN E KRIZAVE
Mos lejoni që migrena të kontrollojë jetën tuaj. Shoqata Amerikane e Migrenës vë në dukje se kjo sëmundje ka tendencë të shfaqet te njerëzit e moshës 15 deri në 55 vjeç. Disa të sëmurë e kanë më të lehtë të identifikojnë qartë shkaktarët ose faktorët që shkaktojnë dhimbje koke, siç mund të jenë alergjitë, drita dhe stresi. Nëse arrijmë të kontrollojmë këta faktorë, atëherë mund të parandalojmë shfaqjen e krizave. Më poshtë janë disa këshilla praktike që mund t’ju vijnë në ndihmë.
Hani vakte të shpeshta gjatë ditës
Nëse qëndroni disa orë pa ngrënë kjo mund të jetë problem, pasi mund të çojë në shfaqjen e krizave ndaj edhe është e rëndësishme që të konsumoni vakte të shpeshta gjatë ditës.
Frutat e thata
Kur presim shumë gjatë midis vakteve, nivelet tona të sheqerit në gjak bien, gjë që mund të shkaktojë një migrenë. Mbani një grusht arra, apo çdo lloj fruti tjetër të thatë që t’i konsumoni kur keni nevojë.
Aktiviteti fizik
Sipas një studimi të zhvilluar në Suedi, të sëmurët me migrenë që ushtronin aktivitet fizik tri herë në javë, kishin më pak gjasë që të vuanin nga migrena. Ndaj edhe mos neglizhoni aktivitetin fizik.
Pushoni mjaftueshëm
Dhimbjet e kokës janë shpesh një shenjë që trupi juaj ka nevojë për pushim. Ndaj edhe ekspertët rekomandojnë që të ndërmerrni herë pas herë pauza të shkurtra për të pushuar. “Shtrihuni në një dhomë të errët dhe të ajrosur mirë. Nëse mundeni, përpiquni të flini një orë ose më shumë, ky mund të jetë një trajtim i shkëlqyeshëm”, thonë mjekët.
Masazhoni dorën
Sipas praktikave të Mjekësisë Tradicionale Kineze, aplikimi i presionit në një pikë në dorë midis gishtit të madh dhe gishtit tregues mund të ndihmojë në lehtësimin e dhimbjes së kokës. Thjesht masazhoni në një lëvizje rrethore për pesë minuta, pastaj ndërroni duart.
Konsumoni ujë
Dhimbja e kokës është një nga shenjat e para të dehidrimit. Për t’u siguruar që po pini lëngje mjaftueshëm, përpiquni t’i konsumoni ato gjatë gjithë ditës. Udhëzimet e Institutit të Mjekësisë thonë se të rriturit duhet të konsumojnë 11 deri në 15 gota ujë në ditë. Edhe konsumi i moderuar i kafesë kontribuon në marrjen tuaj ditore të lëngjeve.