KLP i përgjigjet qeverisë për akuzat ndaj prokurorit
"T'u drejtohen Krimeve të Rënda në rast veprash penale"
"Deklarimet mund të cenojnë procesin gjyqësor", kështu u shpreh dje Këshilli i Lartë i Prokurorisë për akuzat publike të bëra ndaj prokurorit të Durrësit, Arjan Ndoja, nga zëvendëskryeministri Erion Braçe dhe Kryeministri Edi Rama.
Më tej, KLP tha se prej ditësh e ka ndjekur situatën dhe deklarimet, ndërsa shtoi se nëse ka dyshime për kryerje të veprave penale nga ndonjë prokuror në vend, vendi ku duhet të drejtohen në këtë rast është Prokuroria për Krime të Rënda, që heton zyrtarët e lartë. Këshilli, gjithashtu, vë në dukje se në rastet e shkeljeve disiplinore nga ana e prokurorëve, organi kompetent që merr denoncimet është ende Prokuroria e Përgjithshme, në kushtet kur ende nuk është ngritur Inspektorati i Lartë i Drejtësisë. "Këshilli i Lartë i Prokurorisë është institucioni shtetëror i ngarkuar nga Kushtetuta me detyrën për të garantuar pavarësinë, llogaridhënien dhe statusin e prokurorëve të Republikës së Shqipërisë. Në ushtrim të kësaj detyre, ne ndjekim me vëmendje çdo reagim publik lidhur me punën e institucionit të Prokurorisë dhe të prokurorëve të veçantë. Në këtë kuadër, Këshilli i Lartë i Prokurorisë ka ndjekur me vëmendje deklarimet publike të drejtuesve të qeverisë në lidhje me procedurat ligjore të ndërmarra nga Prokuroria dhe Gjykata e Shkallës së Parë Durrës për caktimin e masës së sigurisë ndaj drejtorit të Drejtorisë Vendore të Agjencisë Shtetërore të Kadastrës. Këshilli vëren se deklarimet e sipërpërmendura janë të tilla që mund të paragjykojnë ecurinë dhe përfundimin e një procesi gjyqësor në vijim dhe të procedurave të tjera ligjore. Këshilli i Lartë i Prokurorisë inkurajon deklaruesit, si dhe çdo subjekt tjetër publik ose privat, të denoncojnë pranë Prokurorisë së Krimeve të Rënda të gjitha rastet e dyshuara të kryerjes së veprave penale nga çdo prokuror i Republikës, ndërsa dyshimet për kryerjen e shkeljeve disiplinore duhet të denoncohen pranë Prokurorit të Përgjithshëm ( derisa të krijohet Inspektori i Lartë i Drejtësisë) dhe institucioneve të vetingut. Nga ana tjetër, Këshilli i Lartë i Prokurorisë iu bën thirrje të gjithë prokurorëve të Republikës të vijojnë punën me përgjegjshmëri të lartë në zbatim të kompetencave të tyre kushtetuese për ushtrimin e ndjekjes penale dhe përfaqësimin e akuzës në shërbim të shoqërisë. Mënyra më e mirë për të arritur tek e vërteta është respektimi i procedurave dhe i institucioneve të ngarkuara nga ligji me dhënien e drejtësisë", njoftoi dje KLP.
PROCESI DHE AKUZAT Prokurori Arjan Ndoja ka nën hetim dosjen ndaj ish- drejtorit të Kadastrës Shtetërore në Durrës, Liridon Pulës, i cili akuzohet se ka shpërdoruar detyrën. Duke iu referuar dosjes, prokurori ka dyshime se ka favorizuar një kompani për regjistrim pronash në zonën e Gjirit të Lalëzit. Prokuroria e Durrësit, e përfaqësuar nga Ndoja, pretendon se gjatë procedurës së ndjekur për regjistrimin e këtyre pasurive, janë konstatuar shkelje. Ndërkohë, në lidhje me këtë akuzë të ngritur ndaj Pulës, prokurori Arjan Ndoja është akuzuar fillimisht nga zëvendëskryeministri Erion Braçe dhe më pas edhe nga Kryeministri Edi Rama. Erion Braçe e ndoqi vetë seancën gjyqësore në Durrës, drejtuar nga gjyqtarja Besiana Garxenaj, ku tha se prokurori Arjan Ndoja nuk paraqiti asnjë provë të vetme për të fajësuar Liridon Pulën. Madje, sipas Braçes, pati shkelje të rëndë kushtetuese, pasi akuza e shpërdorimit të detyrës është ngritur mbi bazën e ligjeve për institucionet e vjetra, siç ka qenë ALUIZNI, që tashmë është shkrirë bashkë me Hipotekën, e cila është Agjencia Shtetërore e Kadastrës.
GJYQTARJA Kërkesa e Prokurorisë së Durrësit për caktimin e masës së sigurisë "Arrest në burg" për ish- kreun e Kadastrës, Liridon Pula, është pranuar nga gjyqtarja Besiana Garxenaj, e cila është emëruar në këtë Gjykatë në vitin 2017 dhe ende nuk është përballur me procesin e vetingut. Por ndërsa kërkesa e Prokurorisë është miratuar edhe në Gjykatë, akuzat vazhdojnë të jenë në drejtim të prokurorit. Më herët, gjyqtarja Besiana Garxenaj ka pasur në shqyrtim edhe padinë e Presidentit Nishani kundër ish- zëvendëskryeministrit Bashkim Kopliku, në vitin 2017.