Meta flet për “Venecian”: Zgjedhjet të paligjshme, asnjë gjykatë nuk e ka rrëzuar Presidentin
"Zgjedhjet kanë qenë antikushtetuese, të paligjshme, se asnjë gjykatë nuk e ka rrëzuar dekretin e Presidentit"
Presidenti Ilir Meta akuzon Kryeministrin Edi Rama se ndonjëherë ky i fundit nuk e do demokracinë dhe pluralizmin politik.
Në një intervistë për televizionin shtetëror të Estonisë, kreu i shtetit ka folur për marrëdhënien e tij me Kryeministrin Rama. "Me të jam në rregull dhe nuk kam probleme. Nganjëherë ai ka vështirësi për të bashkëjetuar në harmoni me demokracinë, me pluralizmin politik dhe me zgjedhjet e lira e të ndershme, por këto janë themelet për një vend demokratik dhe europian", tha Meta. Ndërkohë, në një bashkëbisedim me studentët ekselentë në Universitetit Europian të Tiranës ditën e djeshme, kreu i shtetit foli për hapjen e negociatave, për krizën politike në Shqipëri dhe për opinionin e Komisionit të Venecias. Meta tha se Shqipëria ka humbur shumë në procesin e integrimit, ndërsa akuzoi politikën shqiptare se stis krizë politike artificiale për t'iu shmangur llogaridhënies.
HAPJA E NEGOCIATAVE Kemi humbur shumë kohë dhe ne si popull dallohemi që humbim shumë kohë. Në vitin 2001- 2002 kemi qenë me të njëjtin hap me Kroacinë dhe shumë më parë se Serbia. Po tani, ku jemi?! Ata janë shumë më para me hapjen e kapitujve, ndërsa ne endemi për të marrë një datë. Kjo nuk është një përgjegjësi e popullit shqiptar, sepse shoqëria jonë është një shoqëri që funksionon në mënyrë europiane. Ndërkohë, politika në nivelet e larta është mjaft toksike, mjaft konfliktuale. Dhe është artificiale mbi të gjitha sepse është zgjidhur kjo mënyrë për t'u shmangur nga llogaridhënia. Në një situatë normale ka një llogaridhënie në Parlament me interpelanca, me komisione hetimore, ndërsa kështu e bën të pamundur për qytetarët që të shohin se si po menaxhohen taksat e tyre dhe si qeverisen. Është kjo situatë konfliktuale, që na ka çuar këtu ku jemi. Dikush mund të thotë se: Pse na i vë këto kushte Bundestagu? Ata kanë 3 vite që na i thonë këto gjëra. Europa ka disa standarde. Ka kritikë politike, institucionale të funksionimit të shtetit. Ne i kemi ditur këto gjëra, i ka ditur dhe Kryeministri, i kam ditur edhe unë. Por interesi politik afatshkurtër ka dominuar mbi një interes më të madh të shtetit. Interes i gabuar, që disa gjëra mund të zgjidhen me lobingje. Jo gjithçka zgjidhet me lobingje. Eurospekticizmi nuk është ndihmues. Sa kohë kanë ata të Bundestagut me çështjen e hetimit të dosjeve të zgjedhjeve? Sa herë! Çështja e zgjedhjeve është themelore. Ne këtë problem kemi, si i interpretojmë. Shqipëria ka një problem, ka një lidership që nuk do të mbajë përgjegjësi. Nuk jemi në rregull me detyrat e shtëpisë. Vit pas viti janë mbartur nga viti në vit dhe ne i kemi shtyrë këto detyrime. Do të futësh hundët te drejtësia. Do të bësh atë, do të bësh këtë, kjo nuk është rruga dhe humbet besimin që ata të shohin si partner të besueshëm e serioz", u shpreh Meta.
OPINIONI I "VENECIAS" "Nuk do ndaloj Komisionin e Venecias që të çmendet, jam i gatshëm t'i nënshtrohem çdo kontrolli mjekësor nëse mendoni se përdor doping. Unë jam shumë i qartë, Kushtetuta e Shqipërisë të drejtën ia jep Presidentit dhe askujt tjetër. Anulimi i zgjedhjeve nuk është një akt normal, se u konsultua Presidenti me partitë, por nga nëntori deri në 10 qershor, ju e dini që nuk ka qenë një situatë normale. Konfrontimi u evitua. Nuk do të kishte sot një vendim apo një shpresë se mund të merret një autorizim se do të merrej një vendim për çeljen e negociatave. U detyrova që të anuloja zgjedhjet e 30 qershorit. E anulova 30 qershorin për të parandaluar një përplasje të mundshme, që mund të përshkallëzohej më tej. Sepse në Shqipëri janë vrarë, duke filluar nga 2 prilli i 1991 deri në 21 janar. Zgjedhjet kanë qenë antikushtetuese, të paligjshme, se asnjë gjykatë nuk e ka rrëzuar dekretin e Presidentit. Gjykata Kushtetuese mund të caktojë nëse kam bërë shkelje ose jo, por nuk vendos për legjitimitetin e zgjedhjeve të 30 qershorit", tha Meta.
REFORMA NË DREJTËSI Unë kam qenë kritik ndaj Reformës në Drejtësi, për arsye shumë të qartë. Sepse kjo është një reformë e miratuar me 140 vota dhe kur ka ardhur puna te zbatimi, është zbatuar e njëanshme dhe kështu vijon edhe sot. Unë kam bërë përpjekjet që kjo të mos ndodhë kështu sepse e di se ç'do të thotë të politizosh të gjithë institucionet e drejtësisë e aq më tepër ta përdorësh si armë ndaj kundërshtarëve politikë. Rasti më shqetësues është zgjedhja e Prokurorit të Përgjithshëm të Përkohshëm. Është një term që nuk ekziston në Kushtetutën e miratuar më 22 korrik.
ZGJEDHJET NË KOSOVË Na duket vërtet sikur zgjedhjet në Kosovë janë si zgjedhjet në Danimarkë. Lidershipi politik këtu e ka bërë të vështirë për shqiptarët, jo se shqiptarët nuk duan zgjedhje të rregullta. Por në Kosovë kanë sistem elektoral me lista të hapura, pra voton partinë, por edhe kandidatin. Kryetari i partisë mund mos të të preferojë dhe të lë në fund, por të zgjedh populli. LDK- ja u detyrua praktikisht, dëgjoi reagimin nga qytetarët dhe vendosi si kandidate për Kryeministër Vjosa Osmanin, e cila ishte e 87- ta në listën e kaluar, por doli e dyta në të gjithë Kosovën, pasi ishte kritike ndaj disa politikave të LDK- së dhe qytetarët e mbështetën. Ka një meritë sistemi, pasi u jep mundësi qytetarëve dhe i vendos partitë nën presion për të zgjedhur njerëzit e duhur. Drama jonë fillon në 2008. Ne kemi pasur një Kushtetutë shumë të mirë. Këtu Kushtetuta e ' 98 u bë që mos përsëritej 1996- 1997 që solli një situatë kaosi dhe në vitin 2008, ajo që ndodhi me lista të mbyllura, për të cilat ne nuk ishim gati. Ne nuk i kemi partitë "demokratike" dhe nuk kemi kulturë të konsoliduar demokratike. Që atëherë, partitë u mbyllën më shumë. Deputetët nuk bëjnë oponencë apo shprehin mendim personal, pasi e dinë që vendi i tyre nuk varet nga reagimi qytetar, por nga partia dhe pozicioni i tij si kandidat varet nga forca që ka partia në zonën përkatëse. Kjo e ka goditur në thelb dhe në zemër demokracinë parlamentare. Ky është një problem që duhet parë me shumë përgjegjësi në Reformën Zgjedhore. Por nuk është Reforma Zgjedhore e vetmja që garanton zgjedhjet e mira. Në Shqipëri nuk kanë funksionuar institucionet. Në Kosovë, për 5 raste fotografimi të votës Prokuroria dhe Policia reagoi menjëherë në mënyrë të shpejtë.
MARRËDHËNIET SHQIPËRI& KOSOVË Unë mendoj se marrëdhëniet mes Shqipërisë dhe Kosovës mund të jenë edhe më të mira, sepse ka potencial. Ka shumë takimi, por nuk janë ato rezultate që duhen, pavarësisht se ka rritje të shkëmbimit ekonomik, por jo në nivelet e duhura. Dhe ka shumë politikë, ndonjëherë për politikë të brendshme ka deklarata politike, gjë që nuk është e dobishme. Në këtë drejtim, mendoj se është votuar për të bërë një ndryshim. Për këtë ka një meritë edhe Haradinaj, që i hapi rrugë këtij ndryshimi. Sa i përket dialogut Kosovë- Serbi, neve nuk na përket të ndërhyjmë pasi është cenim i sovranitetit të institucioneve të Kosovës dhe na mbetet vetëm ta mbështesim. Për Albin Kurtin mund të them se ka një potencial intelektual dhe politik të mjaftueshëm, pavarësisht se nuk kam menduar se do të dilte forcë e parë. Kjo, për arsyen se ka marrë një goditje të fortë kur iu shkëput një grup deputetësh, siç ishte edhe kryetari i Bashkisë së Prishtinës. Ngritja e VV- së pas kësaj goditjeje ka qenë për meritë të Albinit. E ardhmja nuk është e thjeshtë, sepse të qeverisësh nuk është njësoj si të jesh në opozitë. Është e rëndësishme edhe filozofia që do të ndjekë, sepse do t'i duhet të bashkëpunojë me një partner. Për mua, si në opozitë, si në qeveri, në demokraci është e njëjta gjë në kuptimin e përgjegjësisë publike dhe para qytetarëve dhe se kam kuptuar kurrë shqetësimin e daljes në opozitë. Shërben për të rimarrë veten.
Unë kam qenë kritik ndaj Reformës në Drejtësi, për arsye shumë të qartë. Sepse kjo është një reformë e miratuar me 140 vota dhe kur ka ardhur puna te zbatimi, është zbatuar e njëanshme dhe kështu vijon edhe sot