Banka Botërore: PPP- të të rrezikshme, ekonomia po ngadalësohet
"Kërkesë qeverisë për kostot e nismave fiskale, raport periodik për rezultatet e këtyre politikave dhe përfituesit e tyre"
Ulja e prodhimit të energjisë do të reflektohet në buxhetin e këtij viti, duke "gjunjëzuar" qeverinë për rritjen ekonomike.
Në raportin ekonomik për vendet e Ballkanit Perëndimor, Banka Botërore parashikon ngadalësim të ekonomisë në 2.9 për qind, nga 3.8 për qind që ishte parashikuar në fillim. Kjo tkurrje i faturohet pakësimit të reshjeve dhe reduktimit të prodhimit të energjisë. Por një rrezik i shtuar janë edhe koncesionet, për të cilat kjo qeveri e ka lëshuar dorën. Ndërsa ka kërkuar më shumë kontroll mbi to, Banka Botërore ka paralajmëruar hartimin e një raporti mbi kostot dhe performacën e kontratave të firmosura deri më tani. "Janë shtuar rreziqet nga projektet e Partneritetit Publik- Privat ( PPP). Banka Botërore po harton një raport për PPP- të, ku po analizohen kostot dhe performanca e kontratave. Banka rekomandon që të ketë shumë përfshirje të qeverisë në instrumentet PPP", tha Ilda Shijaku, ekonomiste e Bankës Botërore. LEHTËSIRAT FISKALE Veç PPP- ve, Banka Botërore ka kërkuar "llogari" edhe mbi lehtësirat fiskale të ndërmarra nga qeveria. Ka dyshime se politika të caktuara kanë shërbyer për të favorizuar biznese apo sipërmarrje të caktuara. Për këtë, BB ka kërkuar që të publikohen emrat e përfituesve nga incetivat fiskale. "Ne i kemi kërkuar qeverisë kostot për çdo nismë fiskale dhe të publikojë një raport periodik për rezultatet e këtyre politikave dhe kush përfitoi", tha më tej Shijaku. Lidhur me informalitetin, Shijaku vlerësoi pozitivisht nismën për zëvendësimin e kasave fiskale me faturë elektronike. "Nëse fiskalizimi është mënyra e duhur dhe synon të rrisë kontrollin në financa, kjo është pozitive". REKOMANDIMET Nga ana tjetër, Banka Botërore është shprehur optimiste sa i takon ekonomisë në planin afatmesëm, për të cilin ka parashikuar rritje me 3.5 për qind. Por në efektin e ngadalësimit të ekonomisë globale, ka rekomanduar që Shqipëria duhet të ruajë konsolidimin fiskal dhe të rrisë efikasitetin e shpenzimeve publike. "Forcimi i kontrollit të shpenzimeve publike për paga, reduktimi i shpenzimeve tatimore dhe përmirësimi i programeve të përkrahjes sociale mund të çojnë në rritje të investimeve publike, më shumë barazi dhe krijimin e amortizuesve fiskalë për zbutjen e rreziqeve në rritje në rajon", theksohet në raport.