Integrimi, Basha: Rama, përgjegjësi i vetëm për dështimin
“Propozimi për daljen nga kriza dhe për Reformën Zgjedhore mbetet në tryezë”
Kryedemokrati Lulzim Basha akuzoi dje Kryeministrin Edi Rama se po pengon Shqipërinë që të integrohet në Bashkimin Europian. Në një prononcim për mediat pas takimit me ministrin e Jashtëm të Austrisë, Alexander Schallenberg, në një nga hotelet e kryeqytetit, Basha tha se ndau me Schallenberg shqetësimin për qëndrimin e shumë faktorëve europianë në raport me mosbesimin që ka krijuar qeveria shqiptare, duke mos plotësuar kriteret kryesore të hapjes së negociatave.
Sipas kreut të selisë blu, Kryeministri po synon të devijojë vëmendjen nga dështimi i tij për herë të 4- t për çeljen e negociatave, duke akuzuar Bashkimin Europian, opozitën, median dhe qytetarët. “Dua ta them fare qartë para jush dhe para gjithë qytetarëve shqiptarë, që rruga që ka zgjedhur Edi Rama është rruga absolutisht e gabuar në këto javë që kanë mbetur në marrjen e një vendimi kaq të rëndësishëm për vendin tonë. Është rruga e njohur e fajësimit të çdokujt tjetër, e sulmeve ndaj Bashkimit Europian, e sulmeve ndaj qeverive europiane, e sulmeve ndaj shënjestrës së preferuar, opozitës, Partisë Demokratike, medias, madje edhe qytetarëve, për të hequr vëmendjen dhe për të hequr përgjegjësinë nga i vetmi njeri përgjegjës në këtë situatë. Dështimi për herë të katërt ka vetëm një firmë, vetëm një vulë, vetëm një emër dhe ky është Edi Rama”, tha Basha. Sipas kryedemokratit, vendi po ecën me marrsh indietro, ndaj ai i kujton edhe një herë kKyeministrit Rama që të reflektojë mbi platformën me 5 pika për të plotësuar një nga kushtet e Bundestagut gjerman, atë të Reformës Zgjedhore. “Opozita e bashkuar është në krye të detyrës. Propozimi ynë për daljen nga kriza dhe në veçanti propozimi për Reformën Zgjedhore vazhdon të mbetet në tryezë. Dhe me këtë përgjegjësi që kemi marrë para shqiptarëve, me të njëjtën përgjegjësi i kam konfirmuar sot ministrit të Jashtëm austriak se mund të mbështeten plotësisht te PDja, tek opozita e bashkuar. Ne jemi të vendosur që të bëjmë gjithçka që Shqipëria të mos mbetet peng e korrupsionit, e lidhjeve të politikës me krimin, e kapjes së shtetit dhe asgjësimit të pushteteve të pavarura, qofshin drejtësia apo media e pavarur dhe se synimi ynë kryesor është që, përmes zgjidhjes politike t’u ofrojmë shqiptarëve atë që meritojmë”, tha Basha. I pyetur në lidhje me deklaratat e kryediplomatit të BE- së, Josep Borrell, i cili u shpreh dy ditë më parë se Kosova nuk mund të jetë shtet për sa kohë kur superfuqi si India, Kina apo Rusia nuk e njohin pavarësinë, kryedemokrati tha se pavarësinë e Kosovës e njohin më shumë se gjysma e vendeve të OKB- së. “Kosova është një vend i pavarur, i njohur nga shumica e vendeve anëtare të OKB- së dhe nga shumica dërrmuese e vendeve anëtare të BE- së dhe të NATO- s”, përfundoi lideri i opozitës.
Opozita e bashkuar është në krye të detyrës. Propozimi ynë për daljen nga kriza dhe në veçanti propozimi për Reformën Zgjedhore vazhdon të mbetet në tryezë. Dhe me këtë përgjegjësi që kemi marrë para shqiptarëve, me të njëjtën përgjegjësi i kam konfirmuar sot ministrit të Jashtëm austriak se mund të mbështeten plotësisht te PD- ja, tek opozita e bashkuar