Raiffeisen Bank dhe Posta Shqiptare, pakt për depozitimet cash
Raiffeisen Bank ka nënshkruar marrëveshjen e bashkëpunimit me Postën Shqiptare për shërbimin më të ri që do të ofrojë për të gjithë klientët e saj, atë të depozitimit cash pranë sporteleve të zyrave postare. Nëpërmjet këtij pakti të firmosur nga drejtori i përgjithshëm i Raiffeisen Bank, Christian Canacaris, dhe administratori i Postës Shqiptare, Laert Duraj, Raiffeisen Bank iu ofron klientëve të saj mundësinë për të kryer transaksione për depozitime cash në llogari të klientëve të bankës, apo në llogaritë e personave të tretë ( individë dhe biznese të vogla), në zonat e pambuluara nga rrjeti i degëve/ agjencive. Drejtori i përgjithshëm i Raiffaisen Bank, Canacaris, vuri në dukje se marrëveshja e arritur është vetëm fillimi i një bashkëpunimi të gjatë. "Jam shumë i lumtur që pas një pune gati 1- vjeçare nga të dyja ekipet, me një dedikim shumë të madh, jemi në gjendje të fillojmë punën në 9 qytete pilot pranë degëve të Postës. Dhe për koincidencë, është edhe 15- vjetori i bankës Raiffeisen dhe kjo më bën akoma edhe më të lumtur që të firmosim këtë marrëveshje së bashku. Do të doja të theksoja se kjo marrëveshje midis dy institucioneve është vetëm fillimi i një bashkëpunimi të gjatë midis Raiffeisen Bank dhe Postës Shqiptare". Ndërsa administratori i Postës Shqiptare, Laert Duraj, ndërsa e cilësoi me rëndësi paktin e arritur, tha se shërbimet për depozitimet cash do të shtrihen në 9 qytete ku banka nuk ka degë të saja. "Kjo marrëveshje midis Postës Shqiptare dhe Raiffeisen Bank, në thelb ka kryerjen e shërbimeve të depozitimeve cash në sportelet e Postës Shqiptare për llogari të Raiffeisen Bank, në 9 qytete që banka nuk ka degë të saja. Jam i bindur që ky është hapi i parë i një rrugëtimi të gjatë, që Posta Shqiptare dhe Raiffeisen Bank do të kryejnë së bashku, për të ofruar një sërë shërbimesh për qytetarët, duke përfshirë të gjithë gamën e shërbimeve financiare që do të mundemi të ofrojmë. Jam shumë i lumtur që me Raiffeisen Bank po firmosim brenda një kohe të shkurtër marrëveshjen e dytë të bashkëpunimit, e cila për Postën Shqiptare përfaqëson një sfidë të kaluar me sukses, pas disa muajve të gjatë përgatitjeje të stafit. Posta Shqiptare tregoi që i përmbush të gjitha standardet e Raiffeisen Bank dhe sot konkretizuam këtë marrëveshje shumë të rëndësishme bashkëpunimi për të dyja palët". Faza e parë e bashkëpunimit do të aplikohet në 9 zyra postare, në qytetet Memaliaj, Këlcyrë, Poliçan, Fushë- Arrëz, Shëngjin, Rrogozhinë, Maliq, Belsh dhe Delvinë.