Sejko: Kredia për sektorin privat është rritur me 7.4 për qind
Për periudhën korrik- gusht, kredia për sektorin privat është rritur me 7.4 për qind. Sipas Guvernatorit të Bankës së Shqipërisë, Gent Sejko, trendi pozitiv i kreditimit ka përfituar nga rritja e kërkesës dhe e ofertës për kredi. "Përmirësimi i ofertës dëshmon rrezikun në rënie të kreditimit në vend, sikundër ilustrohet nga rënia në 11% e nivelit të kredive me probleme në muajin gusht', tha Sejko. Gjatë takimit të zhvilluar me delegacionin e Bankës Botërore, Guvernatori vuri në dukje kontributin që jep Banka e Shqipërisë në zhvillimin e mëtejshëm ekonomik të vendit. Politika monetare lehtësuese e ndjekur nga Banka e Shqipërisë, sipas Sejkos ka krijuar kushte të favorshme në ekonomi dhe stimujt e nevojshëm në tregjet financiare. "Aktualisht, tregjet karakterizohen nga norma të ulëta interesi, situatë e mirë likuiditeti, qëndrueshmëri në rritje e kursit të këmbimit dhe një trend rritës kreditimi". Pjesë e diskutimit gjatë këtij takimi ishte dhe zhvillimi i teknologjive financiare, të njohura sot në botën financiare me termin Fintech. Zhvillimi i tyre përbën një potencial të madh për vendin që duhet shfrytëzuar, por gjithmonë duke ndjekur një zbatim efektiv që garanton ruajtjen e stabilitetit financiar. Kjo gjë duhet të shoqërohet edhe me rritjen e edukatës financiare, si një komponent i rëndësishëm për sigurimin e një aksesi më të gjerë në shërbimet financiare dhe rrjedhimisht në potencialin kreditues. Banka e Shqipërisë ka marrë po ashtu mbështetjen e Bankës Botërore për zbatimin e një plani masash, me anë të të cilave synohet përmirësimi sasior e cilësor i kreditimit dhe zgjerimi i gamës së produkteve financiare.