Largimi nga SPAK, Donika Prela kërkon të caktohet në Apel
Prela kërkon të caktohet përkohësisht në Prokurorinë e Apelit ose në atë të Përgjithshmen
Me anë të një kërkese të dërguar në Këshillin e Lartë të Prokurorisë, drejtuesja e komanduar e Krimeve të Rënda, Donika Prela, ka kërkuar caktimin e përkohshëm në Prokurorinë e Apelit Tiranë, ose në Prokurorinë e Përgjithshme.
Kërkesa mësohet se është dërguar në datën 2 tetor, ndërsa është duke u shqyrtuar fillimisht nga Komisioni i Karrierës dhe me shumë gjasë, do të jetë për shqyrtim në mbledhjen e radhës së KLP. Kërkesa e Prelës vjen në një moment kur Këshilli i Lartë i Prokurorisë pritet që të marrë një vendim sa i takon ngritjes së Strukturës së Posaçme Antikorrupsion, ngritja e së cilës do të çonte Donika Prelën në Prokurorinë e Durrësit, ku edhe është e emëruar. Kujtojmë se drejtuesja e përkohshme e Prokurorisë për Krime të Rënda kandidoi edhe për të qenë pjesë e SPAK, por nuk arriti të futej në listën e 15 më të mirëve, të përzgjedhur nga organi që qeveris Prokurorinë. Mungesa e Prelës dhe ishkreut të Prokurorisë së Krimeve të Rënda, Besim Hajdarmataj, ishte surpriza e listës së miratuar nga KLP, pas një procesi përzgjedhës që konsistoi në vlerësimin e punës, integritetit dhe më pas intervistimi i secilit. CAKTIMET E PËRKOHS
HME Duke iu referuar parashikimeve ligjore, KLP mund të bëjë caktime të përkohshme të prokurorëve, ndërsa deri më tani janë bërë në bazë të nevojës së sistemit. Që prej nisjes së detyrës, Këshilli ka bërë disa caktime të përkohshme, për të mbuluar mungesat apo vakancat e krijuara nga procesi i rivlerësimit kalimtar, vetingut. Kujtojmë se Prela ka është e emëruar në Prokurorinë e Durrësit, ku prej vitit 2004 ka qenë Drejtuese e Forcës së Posaçme Kundër Krimit të Organizuar ( Task Forcë) të krijuar pranë Prokurorisë së Rrethit Gjyqësor Durrës. Ndërkohë, nga shkurti i 2017- ës, deri në janar 2018, ka qenë drejtuese e Seksionit për Hetimin e Krimit Ekonomiko- Financiar dhe Kibernernetik. Pesë muajt e parë të vitit 2018 ka mbajtur detyrën e drejtueses së Prokurorisë së Rrethit Gjyqësor Durrës.
URDHRI Donika Prela u caktua përkohësisht drejtuese e Prokurorisë për Krime të Rënda në maj të 2018, nga Prokurorja e Përkohshme e Përgjithshme, Arta Marku. Prokurorja e Përgjithshme, znj. Arta Marku, me urdhrin nr. 136, dt. 9 maj 2018, vendosi largimin nga detyra të drejtuesit të Prokurorisë për Krime të Rënda, z. Besim Hajdaramataj, i cili mbetet prokuror në Prokurorinë për Krime të Rënda. Prokurorja e Përgjithshme, znj. Arta Marku, njofton caktimin e znj. Donika Prela si kreu i Prokurorisë për Krime të Rënda. Ky ndryshim ka për qëllim përshpejtimin e hetimeve të çështjeve sensitive që ka Prokuroria për Krime të Rënda. Kemi besim se ky ndryshim në drejtim do të sjellë si rezultat ndjekje penale më të shpejtë dhe më të efektshme të çështjeve me përparësi të lartë", njoftoi Prokuroria në atë kohë. Por pavarësisht se motivacioni i këtij ndryshimi ishte përshpejtimi i hetimeve në çështjet sensitive, Prela ka qenë një ndër më të kontestuarat prej kolegëve të saj dhe jo vetëm.