Iu refuzua azili në Francë e Belgjikë, riatdhesohen 60 shqiptarë
Në vazhdim të organizimit të operacioneve të riatdhesimit për shtetasit shqiptarë me qëndrim të parregullt në territorin francez, si edhe për persona apo familje, të cilëve iu është refuzuar azili në Francë, mesditën e djeshme u organizua operacioni i riatdhesimit, si rezultat i bashkëpunimit mes Francës dhe FRONTEX- it, me nisje nga Aeroporti "Lille Lesquin". Gjatë këtij operacioni u riatdhesuan gjithsej 60 shtetas shqiptarë , nga këta 55 nga Franca dhe 5 nga Belgjika, të cilët kishin vendim për dalje nga territori francez apo belg, për shkak të qëndrimit të parregullt apo kërkimit të azilit në këto vende. Policia e Shtetit apelon për të gjithë shtetasit shqiptarë që udhëtojnë për në vendet e BE- së, të respektojnë rregullat e lëvizjes në hapësirën Shengen dhe të mos kërkojnë azil, pasi shanset për ta fituar janë zero. Ndërkohë, Policia Kufitare ka forcuar kontrollet në pikat e kalimit kufitar, në drejtim të verifikimit të dokumentacionit dhe plotësimit të kushteve për të udhëtuar në vendet e BE- së, si dhe me patrulla të shtuara në kufirin jeshil për të parandaluar kalimin e paligjshëm të kufirit. Disa ditë më parë, gjatë një deklarate për shtyp, drejtori i Kufirit dhe Migracionit, Eduart Merkaj, i cili bëri një analizë të situatës prej fillimit të vitit, tha se Policia e Shtetit ka zhvilluar fushata të gjera ndërgjegjësimi për parandalimin e abuzimit me të drejtën e lëvizjes së lirë në hapësirën Shengen dhe po zbaton një sërë masash shtesë për parandalimin e azilkërkimit. "Si rezultat i këtyre masave, gjatë periudhës janar- shtator, nga shërbimet e Policisë Kufitare, në të gjitha pikat e kalimit kufitar iu është ndaluar përkohësisht udhëtimi drejt zonës Schengen 10,684 shtetasve shqiptarë, ose 30% më pak se e njëjta periudhë e vitit të kaluar, ndër të cilët 735 shtetas të mitur që nuk kanë plotësuar kriteret për të udhëtuar jashtë vendit. Njëkohësisht, nga ana e Policisë Kufitare në bashkëpunim me strukturat e Drejtorive Vendore të Policisë në qarqe janë duke u ndjekur dhe verifikuar 14 raste të braktisjes së fëmijëve nga prindërit, me qëllim përfitimin e azilit në Francë apo Gjermani. Po si rezultat i masave shtesë dhe fushatave sensibilizuese, numri i shtetasve shqiptarë që iu është refuzuar hyrja në zonën Shengen ka pësuar rënie me 13%, ndërsa numri i shtetasve shqiptarë të deportuar nga vendet e BEsë ka shënuar rënie me 20%", u shpreh Merkaj.