Makina përplas dy të mitur sa dolën nga shkolla në Kamzë
Fëmijët e plagosur, 6 dhe 15 vjeç, jashtë rrezikut për jetën. Shoqërohet në Polici drejtuesi i mjetit
Tre të mitur u plagosën dje në dy aksidente automobilistike, që ndodhën në zonën e Kamzës dhe të Babrrusë.
Mesditën e djeshme, një automjet përplasi një djalë 6 vjeç dhe një vajzë 15 vjeçe, të cilët sapo kishin dalë nga shkolla dhe po kalonin nga njëra anë e rrugës në tjetrën. Ngjarja ndodhi rreth orës 12: 10, ndërsa Policia shoqëroi në Komisariat për veprime të mëtejshme drejtuesin e makinës që shkaktoi aksidentin, shtetasin me iniciale S. Ç. Burimet thanë se dy të miturit e aksidentuar ndodhen në spital, jashtë rrezikut për jetën. "Rreth orës 12: 10, në Kamzë, automjeti me drejtues shtetasin S. Ç. ka aksidentuar këmbësorët, shtetasit e mitur A. M., 6 vjeç dhe L. M., 15 vjeçe. Si pasojë e përplasjes, dy të miturit u dërguan në spital për ndihmë të specializuar mjekësore. Drejtuesi i automjetit, shtetasi S. Ç., do shoqërohet në Komisariat për veprime të mëtejshme hetimore. Policia Rrugore ndodhet në vendngjarje, ku po vijon punën për sqarimin e rrethanave të ngjarjes dhe shkakut të aksidentit", tha zyrtarisht Policia. Ndërsa pak minuta më vonë, në Babrru, një tjetër i mitur u aksidentua teksa po lëvizte me biçikletë. Burimet thanë se 15vjeçari u godit nga një motor dhe u dërgua me urgjencë në spital. Policia shoqëroi drejtuesin e motorit, ndërsa mësohet se gjendja e të miturit që mbeti i plagosur vazhdon të jetë kritike. Një tjetër aksident i rëndë ndodhi pasditen e djeshme te Rruga e Kavajës, ku dy motorë u përplasën kokë më kokë e për pasojë dy drejtuesit mbetën të plagosur rëndë. Dëshmitarët thanë se njëri nga të rinjtë e aksidentuar ka qëndruar pa ndjenja në asfalt për një kohë të gjatë. Kanë qenë kalimtarët ata që janë munduar t'i vijnë në ndihmë, para se në vendngjarje të mbërrinte Policia dhe ambulanca. Sipas dëshmitarëve, drejtuesi tjetër ka qenë i vetëdijshëm, por i plagosur rëndë. Personat që ndodheshin në vendngjarje dhe iu erdhën në ndihmë të plagosurve, thanë se kanë lajmëruar menjëherë ambulancën, por i është dashur afro 20 minuta që të mbërrijë në adresën që i kishin dhënë. Ndërkohë, shërbimet e Policisë Rrugore kanë shkuar brenda pak sekondash në vendin e aksidentit, ku kanë nisur veprimet hetimore. Dy të plagosurit janë transportuar drejt Spitalit të Traumës, ku mësohet se gjendja e tyre është më e stabilizuar. Policia tha se ka nisur hetimet për zbardhjen e rrethanave të aksidentit. Më herët, në autostradën TiranëDurrës u përplasën disa automjete, por fatmirësisht nuk pati persona të plagosur.