Ambasadori i SHBA, vizitë te Vetëvendosja një ditë pas zgjedhjeve
DASH: Rifilloni menjëherë bisedimet për normalizim me Serbinë
Në Kosovë, ambasadori amerikan, Philip Kosnett, u takua me kandidatin për Kryeministër të Lëvizjes Vetëvendosje, Albin Kurti, partia e të cilit doli e para në zgjedhjet e 6 tetorit.
U diskutua për mbarëvajtjen e procesit zgjedhor, luftën kundër korrupsionit, ekonominë dhe për përparimin në dialogun me Serbinë. Kosnett është ambasadori i parë amerikan, që shkel në zyrat e Vetëvendosjes. Ai ka lavdëruar mbarëvajtjen e procesit zgjedhor dhe pjesëmarrjen e lartë të qytetarëve. Ndërkohë, Kurti i ka thënë ambasadorit amerikan se Kosova nuk do të vonohet, por nuk ka as pse të ngutet për të filluar dialogun me Serbinë. Sipas tij, fillimisht duhet të bëhet vlerësimi i marrëveshjeve të deritashme me Serbinë e më pas të shihet si të vazhdohet tutje. Kurti tha se nuk ka diskutuar me ambasadorin në detaje për heqjen e taksës. Me vizitën në zyrat e VV, Kosnett ka riparuar pak raportet e komplikuara të Kurtit me amerikanët. Sipas “Express”, ambasadori Kosnett s’ka pranuar të fotografohet në zyrën e Kurtit, ku ai mban flamurin kombëtar kuqezi. Format e protestës dhe dhuna që ka përdorur Vetëvendosje përgjatë viteve si kundërshtim ndaj proceseve ku po kalonte Kosova, i kanë acaruar marrëdhëniet me ambasadat e huaja në Kosovë e veçanërisht me atë të SHBA.
Ky acarim ndërmjet Vetëvendosjes dhe Ambasadës së Shteteve të Bashkuara të Amerikës kishte kulmuar me incidentin e vitit 2013 kur partia e Kurtit kundërshtonte miratimin e marrëveshjes ndërmjet Kosovës dhe Serbisë. Gjatë një proteste, aktivistë të VV- së kishin bllokuar hyrjen e Kuvendit të Republikës së Kosovës, duke gërvishtur edhe ambasadoren e atëhershme të SHBA- së, Tracy Jacobson, e cila kishte marrë një ftesë zyrtare për të qenë e pranishme në seancë. Ajo kishte publikuar një fotografi, në të cilën shihej krahu i saj i lënduar. Pak ditë më pas, në Prishtinë shkoi zëvendësndihmëssekretari i Shtetit, Philip T. Reeker, që tani mban një post më të lartë në Departamentin e Shtetit. Reeker foli me fjalë të rënda për Vetëvendosjen. “Palaçot që duan të luajnë dhe të jenë të dhunshëm, duhet të mendojnë dy herë se çfarë po i bëjnë pjesës tjetër të vendit… Kjo sjellje nihiliste është e papranueshme në shekullin e 21 në Europë dhe në rajon”, kishte thënë ai. Raportet kishin filluar të përmirësoheshin pas ardhjes së ish- ambasadorit Greg Delawie, i cili u takua dy herë me Kurtin. Vizita e Kosnett në selinë e VV vjen pas përfundimit të zgjedhjeve të 6 tetorit, ku me shumë gjasë, Albin Kurti do të jetë Kryeministri i ri i Kosovës. Pas takimit me Albin Kurtin, kreu i Ambasadës Amerikane në Prishtinë, Philip Kosnett, ka takuar edhe kryetarin e LDK- së, Isa Mustafën. Ndërkohë, Departamenti amerikan i Shtetit tha se SHBA pret që udhëheqja e re të rifillojë menjëherë bisedimet me Serbinë drejt një marrëveshjeje për normalizimin e marrëdhënieve.