Presidenti vlerëson Guvernatorin: BSH ka zbutur efektet e inflacionit
Presidenti: “Paketë politikash pro stabilitetit ekonomik e financiar” Guvernatori: “Ekonomia shqiptare, premisa për përshpejtimin e rritjes”
Presidenti Ilir Meta vlerëson politikat që ka ndjekur Banka e Shqipërisë në momentet kyçe të ekonomisë shqiptare.
Duke folur në konferencën vjetore të BSH, kreu i shtetit nënvizoi ndërhyrjet e duhura për të zbutur efektet e inflacionit si dhe në drejtim të rezervave valutore. “Ulja e ritmeve të rritjes është reflektuar edhe në tregues të tjerë makro- ekonomikë, sikurse në realizim të inflacionit nën objektivin e Bankës së Shqipërisë apo edhe në rënie të ritmit të kredidhënies drejt sektorit privat të ekonomisë. Kundrejt këtyre prirjeve, politika e Bankës së Shqipërisë ka realizuar zbutjen e efekteve negative të tyre. Zbatimi i politikës monetare konvencionale të Bankës së Shqipërisë ka mundësuar ndërhyrjet e duhura në kohën dhe në masën e nevojshme, pa cenuar parimet bazë themeltare ku mbështetet administrimi i mirë i politikës monetare dhe i regjimit të kursit të këmbimit. Në tërësi, kuadri i politikave të ndjekura nga Banka e Shqipërisë në drejtim të rritjes së rezervave valutore, të zbutjes së ndikimit negativ të kursit të këmbimit në normën e inflacionit, të hartimit të një kuadri rregullator në funksion të nxitjes së kreditimit të ekonomisë në monedhën vendase janë elemente të rëndësishme të një pakete politikash që promovojnë stabilitetin makroekonomik e financiar dhe duhen mbështetur”, deklaroi Presidenti. Shqetësimi më i madh, sipas kreut të shtetit, ka të bëjë me dhënien e kredive, të cilat kanë ardhur në rënie përgjatë viteve të fundit. E këtë rënie, Meta e lidh me sundimin e ligjit, duke kërkuar përmirësim të sistemit, me qëllim përmirësimin e ekonomisë. “Mbetet shqetësim që bankat në Shqipëri nuk kanë shumë efekt. Gjatë 10 viteve të fundit, Shqipëria ka nivelin më të vogël të kredive. Një nga arsyet që bankat kanë stopuar në dhënien e kredive, është sundimi i ligjit. Një kthim në shinat e ligjshmërisë dhe forcimit të shtetit të së drejtës, të funksionimit të plotë, të shpejtë e të besueshëm të gjyqësorit, si edhe lufta konkrete ndaj korrupsionit do sillte një ndikim tejet pozitiv, në fuqizimin e kontributit të sistemit bankar, për rritjen ekonomike më të lartë të vendit”. Në konferencë ishin të pranishëm personalitete dhe njohës të ekonomisë, ndërsa fokusi ishte rëndësia që sistemi financiar ka për zhvillimin ekonomik të vendeve të rajonit dhe për procesin integrues të tyre në shoqërinë evropiane.
GUVERNATORI Për guvernatorin e Bankës së Shqipërisë, Gent Sejko, vendi ynë ka premisa për një ekonomi më solide. Eficienca, qëndrueshmëria dhe sofistikimi i sistemit financiar janë parakushte esenciale që vendi të njohë rritje. “Ekonomia shqiptare ka premisa solide për vijimin dhe përshpejtimin e ritmeve të rritjes. Forcimi i stabilitetit financiar, paralelisht me ndjekjen e politikave të kujdesshme monetare, ofron një garanci shtesë për qëndrueshmërinë e saj. Megjithatë, sfidat që kemi përpara nuk janë të pakta”. Lajmi i mirë është se kriza financiare globale, sipas Sejkos, nuk ka prekur thellësisht vendin tonë. Por gjithsesi, ndërpreu rrugën e shtruar më herët drejt rritjes së kreditimit dhe përshpejtimit të rritjes ekonomike. Për fat të mirë, nuk e preku thellësisht Shqipërinë, ndonëse pasojat u ndjenë edhe te ne. “Në ndryshim nga mjaft vende të rajonit, kriza globale nuk prodhoi recesion apo krizë të mirëfilltë financiare në Shqipëri. Megjithatë, pasojat indirekte të saj u ndjenë si në ekonominë shqiptare dhe në sistemin e saj financiar. Si autoritet monetar, mbikëqyrës e rregullator i sektorit bankar, agjenda e punës së Bankës së Shqipërisë gjatë viteve të fundit është fokusuar në trajtimin e sfidave që trashëguam nga kriza”, nënvizoi guvernatori. Në fjalën e tij gjatë konferencës vjetore, Sejko vuri në dukje se objektivi final i punës së Bankës së Shqipërisë ka qenë dhe do të mbetet nxitja e zhvillimit të qëndrueshëm të vendit. Filozofia jonë e punës bazohet në katër shtylla kryesore: profesionalizëm, përgjegjshmëri, llogaridhënie dhe transparencë. Duke reflektuar këto aksione, ekonomia shqiptare, sipas tij, ka bërë progres të dukshëm drejt rritjes së qëndrueshme dhe afatgjatë. “Ky progres është karakterizuar nga përshpejtimi gradual i ritmeve të rritjes, nga zgjerimi i punësimit dhe rënia e papunësisë, si dhe nga shëndoshja e bilanceve të sektorit privat. Në veçanti, sektori bankar shfaqet likuid, i kapitalizuar dhe me tregues të mirë rentabiliteti. Kapitali rregullator luhatet rreth nivelit 18%, dukshëm mbi minimumin e detyrueshëm, ndërsa raporti i kredive me probleme ka rënë në 11%, kundrejt nivelit maksimal prej gati 25% të shënuar në vitin 2014”.