Katër vende, qëndrim kundër Shqipërisë për negociatat
Rama "thërret" Kafkën dhe Kadarenë "kundër" qëndrimeve të vendeve anëtare në Bashkimin Europian
Në një shkrim të botuar dje, Agjencia Franceze e Lajmeve ( AFP) pohon se përveç Holandës, qëndrim kundër mban Franca, Danimarka dhe Spanja.
Ndërkohë, nëpërmjet një postimi në “Twitter”, Rama ka reaguar lidhur me procesin e vendimmarrjes së BE për hapjen ose jo te negociatave për Shqipërinë dhe Maqedoninë e Veriut. "Nëse Franz Kafka apo Ismail Kadareja do të kishin pasur mundësinë të ndiqnin nga brenda këtë procesin e vendimmarrjes së BEsë, për të thënë PO a JO për Shqipërinë dhe Maqedoninë e Veriut, do të kishin parë se si realiteti e konkurron edhe fantazinë e tyre të pakonkurrueshme", shkroi Rama. SHKRIMI NË AFP Disa vende, përfshirë Francën, po bllokojnë hapjen e bisedimeve të pranimit në BE me Shqipërinë dhe Maqedoninë e Veriut, i thanë AFPsë të premten disa diplomatë në Bruksel. Maqedonia e Veriut shpresonte për hapjen e negociatave në një takim të martën në Luksemburg të 28 ministrave të çështjeve të BE- së, por Franca beson se "ky vend nuk i plotëson kushtet e nevojshme", mësuam nga të njëjtat burime në Bruksel. Për Shqipërinë, janë edhe tri vende që e kundërshtojnë, përveç Francës: Danimarka, Holanda dhe Spanja, thanë disa burime. Vetoja franceze vjen tetë ditë pasi katër krerët e institucioneve europiane u drejtuan përmes një letre të përbashkët për hapjen e negociatave. Ky refuzim shkakton dhembje të rëndë nga diplomatët, të cilët akuzuan Parisin se rrezikon stabilitetin e Ballkanit. Dy herë, BE ka vendosur të shtyjë hapjen e negociatave me Shkupin dhe Tiranën. Dhe zyrtarët në Maqedoninë e Veriut kanë paralajmëruar tashmë që qytetarët e tyre nuk do të pranojnë refuzim të pacaktuar, ndërsa nga ana e tyre, ata implementojnë reforma domethënëse, në përputhje me kërkesat e BE, përfshirë ndryshimin e emrit të vendit të tyre. "Kushdo që bllokon procesin e pranimit, tani është përgjegjës për çdo destabilizim të fqinjëve tanë", tha një diplomat europian në AFP. "Një shumicë shumë e madhe në BE është në favor të hapjes së negociatave të pranimit me Maqedoninë e Veriut dhe Shqipërinë. Pozicioni i Francës është pak i mbështetur nga vendet anëtare të BE", shtoi ai. Franca shpreson që vendimi të shtyhet të paktën vitin e ardhshëm dhe që Komisioni i ri Europian, Ekzekutivi i BE- së, përgjegjës për negociatat e zgjerimit, po përgatit një plan të ri pas marrjes së detyrës në 1 nëntorit. Për kritikët e zgjerimit të BE- së, këto dy vende mund të importojnë probleme në BE. Ata nxjerrin në pah problemet që lidhen me korrupsionin dhe drejtësinë, të cilat po ndodhin në Rumani dhe Bullgari, vende të cilat u bashkuan në 2007. Përkrahësit e këtyre vendeve, megjithatë, argumentojnë se refuzimi i anëtarëve të rinj mund t'i shtyjë ata në krahët e fuqive të jashtme, siç janë Kina dhe Rusia.