“Ka një shkelje, por sa për të shkarkuar Metën”
“Keni kaluar kriza që ju kanë ngadalësuar, koha e përgjegjësive”
Pak minuta pasi Komisioni i Venecias miratoi opinionin përfundimtar mbi kërkesën e kryetarit të Kuvendit të Shqipërisë, Gramoz Ruçi, nëse Presidenti Meta shkeli Kushtetutën me dekretin e anulimit të zgjedhjeve të 30 qershorit, kreu i Venecias, Gianni Buquicchio, sqaroi përfundimet e miratuara. Sipas tij, ka një shkelje, por që sipas Komisionit të Venecias, nuk është aq serioze sa të përbëjë arsye për shkarkimin e Presidentit. Në një prononcim për “A2 Neës”, Buquicchio tha se hapat e radhës në Shqipëri do të jenë vendime politike. “Opinioni thotë se kishte një shkelje, por nuk ishte, sipas Komisionit, aq serioze sa të përbënte arsye për shkarkim të Presidentit. Tani është një çështje politike, por unë shpresoj se shqiptarët do të jenë të zgjuar. Që të gjithë, nga Presidenti te qeveria, Parlamenti deri tek opozita, ajo brenda dhe jashtë Parlamentit. Të gjithë në Shqipëri duhet të marrin përgjegjësitë e veta, në interes të vendit dhe popullit”, u shpreh Buquicchio. Kreu i Komisionit të Venecias hodhi poshtë çdo dyshim se ekspertët e Komisionit erdhën në Shqipëri me një vendim apriori. “Si zakonisht, ne morëm të gjitha masat paraprake. Vizituam Shqipërinë dhe delegacioni krijoi një ide të plotë të situatës. Sigurisht, ne nuk dimë gjithçka, por elementet kryesore janë marrë në konsideratë. Rezultati i opinionit dhe bindja e anëtarëve që e hartuan atë ishte i bazuar në mënyrë solide, sidomos në dispozita ligjore”, tha Buquicchio. Presidenti i Komisionit të Venecias tha gjithashtu se e njeh prej shumë vitesh Shqipërinë, aq sa ka arritur të evidentojë edhe problemet e saj. “Shumë është bërë, por shumë mbetet për t’u bërë. Problemi, fatkeqësisht, është mentaliteti, që nuk është shumë i ndryshëm nga mentaliteti në vende të tjera të rajonit, apo edhe në vendin tim. Interesi i qytetarëve duhet të mbizotërojë. Keni kaluar shumë kriza, që kanë ngadalësuar zhvillimin tuaj demokratik dhe ekonomik. Është koha që të gjithë marrin përgjegjësitë”, përfundoi Buquicchio.