Presidencë- Qeveri e lexojnë ndryshe vendimin e “Venecias”

Zëdhënësi i Presidentit: “Maxhoranca shpërndau lajme false”. Kryeministri: “‘ Venecia’ konfirmoi drejtësinë e qëndrimit tonë”

Qeveria dhe Presidenca i lexuan ndryshe konkluzionet e Komisionit të Venecias për çështjen nëse kreu i shtetit e shkeli Kushtetutën me dekretin e datës 10 qershor, që anuloi zgjedhjet e 30 qershorit.

Ende pa u botuar draftopinioni zyrtar i Komisionit të Venecias, palët reaguan duke shkëputur citime nga opinioni i miratuar ditën e djeshme. Kryeministri Edi Rama, nëpërmjet një statusi pasditen e djeshme, nxori tri konkluzione të shkëputura dhe të theksuara me shkronja të mëdha, ku mbronte qëndrimet e maxhorancës para dekretit për anulimin e zgjedhjeve, qëndrimet gjatë qershorit dhe pas zgjedhjeve të 30 qershorit, duke lënë të kuptohet se do t’i shkojnë deri në fund procesit të shkarkimit. “1. Bojkoti elektoral i subjekteve politike, edhe nëse ata përfaqësojnë një pjesë të madhe të votuesve, nuk mund të ndalojnë zhvillimin e zgjedhjeve të rregullta. 2. Përndryshe, këto parti do të fitonin mundësinë të pengonin çdo proces zgjedhor. Anulimi i zgjedhjeve dhe më tej shtyrja e tyre cenoi të drejtën e shtetasve për të zgjedhur. 3. Presidenti veproi në mungesë të bazës ligjore kur anuloi zgjedhjet dhe vendosi shtyrjen e tyre pa pasur një kompetencë të tillë në Kushtetutë e në ligj”, shkroi Kryeministri. Më herët, zëdhënësi i Presidentit, Tedi Blushi, përgënjeshtroi lajmet e publikuara gjatë ditës së djeshme në portale. Edhe Blushi, ashtu si Kryeministri Rama, shkëputi disa fragmente nga draftopinioni i miratuar të premten dhe nxori konkluzionet e tija. “Ekspertët theksojnë thirrjet e Presidentit për dialog dhe pritshmërinë e tij se shtyrja e zgjedhjeve mund të kishte kontribuar në një kompromis midis palëve. Ata theksojnë mungesën e një sfide të drejtpërdrejtë të dekreteve të Presidentit përpara ndonjë gjykate”, citon zëdhënësi Blushi. Ndërkohë, ai akuzon numrin dy të Partisë Socialiste, Taulant Balla, se ka shpërndarë lajme false në lidhje me qëndrimin e Komisionit të Venecias. “Titrat dhe lajmet e gënjeshtërta të shpërndara në panik nga shteti i propagandës dhe të qarkulluara nga përsheshngrënësit mediatikë të PPPve, janë një dëshmi e qartë e dëshpërimit dhe stresit, ku kanë rënë lolot e Rilindjes, me në krye famozin e mashtrimit dhe jo vetëm, Tao Tao, në lidhje me konkluzionet e opinionit final të Komisionit të Venecias. Së pari, dua t’ju bëj me dije një fakt të pakundërshtueshëm dhe lehtësisht të verifikueshëm, që nxjerr në dritë, para të gjithë shqiptarëve dhe opinionit ndërkombëtar, pacipësinë dhe pafytyrësinë e lolove të Rilindjes dhe famozit Tao Tao, që mashtrojnë dhe ndajnë në media, gjoja në emër të Venecias, raporte dhe konkluzione të pavërteta”, tha Blushi. Madje, sipas zëdhënësit të Presidentit, kreu i Grupit Parlamentar të PS- së, Taulant Balla, ka kërkuar falje para anëtarëve të Komisionit të Venecias për keqpërdorimin e draft opinionit. “Gjithashtu, ju bëj me dije, se është e provuar me fakte e prova të pakundërshtueshme, por që për etikë nuk mund të bëhen publike, se Tao Tao dhe lolot që e shoqëronin në ‘ Venecia’, janë detyruar sot të kërkonin falje me përulje para Komisionit, për keqpërdorimin politik të draft- opinionit”, vijoi Blushi.