Ministrja Denaj: Mbështetja gjermane, e rëndësishme për ekonominë
Janë më shumë se 1 miliard euro të akorduara nga Gjermania për vendin tonë dhe po ashtu 200 milionë të tjera të ofruara në formën e asistencës teknike. Gjatë aktiviteteve të organizuara këtë fundjavë nga ambasada gjermane në kuadër të "tetorit Gjerman", ministrja e Financave, Denaj, vlerësoi bashkëpunimin mes Shqipërisë dhe Gjermanisë, duke shprehur mirënjohjen për mbështetjen që qeveria gjermane i ka dhënë dhe i jep vendit tonë. Ky bashkëpunim, vuri në dukje Denaj, është mbështetur në dy shtylla të rëndësishme në bashkëpunimin financiar dhe atë teknik, ku mbështetja është dhënë në projekte të ndryshme në fushën e energjetikës, infrastrukturën sociale, por edhe në fusha të tjera të ekonomisë, si bujqësia apo turizmi. "Janë më shumë se 1 miliard euro dhe pothuajse më shumë se 200 milionë asistencë teknike, të cilat përfshijnë të gjithë këto fusha që përmenda më lart. Fokusi i bashkëpunimit teknik që u prezantua edhe sot në këtë panair, është mbështetja e shoqërisë shqiptare në rrugën e integrimit evropian dhe kjo është një perspektivë e dëshiruar nga të gjitha palët. Sigurisht, bëhet me mbështetjen e të gjithë aktorëve dhe ju falënderoj shumë për temën e zgjedhur për këtë panair ' Talente dhe ide për të ardhmen e Shqipërisë', sepse në fakt, ky panair u takon të rinjve dhe ata do ta çojnë përtej nesh të gjithë procesin e nisur", u shpreh Denaj. Qeveria gjermane ka mbështetur me projekte të ndryshme zhvillimin e arsimit profesional në vendin tonë. Edhe pse sot ka 35 shkolla të arsimit profesional dhe një rritje të numrit të nxënësve që zgjedhin të arsimohen në këto shkolla, nga 14 mijë katër vite më parë në gati 20 mijë për këtë vit, ministrja Denaj informoi se MFE është duke punuar mbi një strategji, e cila do të fokusohet në një përshtatje më të madhe të punësimit me arsimin profesional, si dhe për një qasje tjetër në dëgjimin e zërit të biznesit lidhur me arsimin profesional. "Investimi në shkollat profesionale është i larmishëm dhe ka nisur prej kohësh. Sot jemi të kënaqur që për katër vitet e fundit shohim një rritje të nxënësve në shkollat e arsimit profesional. Janë pothuajse 20 mijë vetë që adresuan formimin e tyre në shkollat profesionale, nga 14 mijë që ishin katër vite më parë. Në këtë aspekt kemi punë për të bërë, si në aspekt të kurrikulave, për të përmirësuar cilësinë e tyre dhe gjetjen e atyre cilësive profesionale që i vlejnë tregut të punës, por edhe infrastrukturës, në mënyrë që shkollat të jenë të përshtatshme dhe për arsimin dual, siç e përmendi ambasadori, pasi kuptohet që në arsimin profesional vetëm teoria nuk mjafton, por gërshetimi i teorisë me praktikën është shumë i rëndësishëm dhe ai i mësuar paralelisht, në stilin gjerman, është apo aq i vyer, sepse e kanë treguar me vepra që është i duhuri", theksoi ministrja gjatë ceremonisë së çeljes së panairit të hapur me tëme "Talente dhe ide për të ardhmen e Shqipërisë".