Peter Handke: Për Millosheviçin flisja si shkrimtar
Austriaku Handke, pas "Nobelit" në Letërsi, u shpreh i kënaqur për fitoren, kjo edhe pasi siç ai theksoi për mediet ndërkombëtare "miqtë e tij në Serbi po e prisnin me padurim". Për "Blic", ai ka rrëfyer se pasi mori lajmin për çmimin kishte marrë xhaketën për të shëtitur në pyjet pranë shtëpisë së tij. I rritur nga nëna e tij, pasi të atin e pati njohur vetëm në moshë të madhe, Peter kishte shprehur mirënjohje ndaj saj. "Fantastike, ishte fantastike. Unë as që e besoja. I thashë vetes se nuk ishte e mundur, se gjithçka ishte fryt i imagjinatës sime… Ne gjithmonë presim që të ndëshkohemi, por ndonjëherë ndodh e kundërta, ashtu siç ndodhi sot", ka thënë Handke më tej. Austriaku i është përgjigjur në njëfarë mënyre edhe dilemës së shumëpërfolur gjatë këtyre ditëve, nëse juria e "Nobelit" duhet të bazohej krahas vlerave të pamohueshme letrare të austriakut edhe tek ato letrare: "Për Millosheviçin dhe Serbinë flisja si shkrimtar", është shprehur ai, duke theksuar se lajmi e ka kapur në befasi. "Nuk e kam menduar asnjëherë se mund të më zgjidhnin, ka qenë një zgjedhje e guximshme", është shprehur Handke. Pavarësisht peticioneve e kontestimeve të vazhdueshme nga qytetarë të thjeshtë, por edhe personalitete të botës së kulturës dhe artit, duket se Akademia Suedeze nuk do të bëjë hapa pas. Lidhur me polemikat e këtyre ditëve sekretari Mats Malm ka folur për "New York Times" duke thënë se ' nuk është në mandatin e akademisë që të balancojë kualitetin letrar me qëndrimet politike'. Ndërsa "Fondacioni Nobel" i kontaktuar nga ' CNN' është shprehur se: "Asnjëherë nuk i komentojnë përzgjedhjet e pavarura, të cilat jepen nga institucionet që zgjedhin laureatët për Çmime Nobel". Peticionet virtuale për anulimin e "Nobelit" për Peter Handke, këtë të hënë do të pasohen me protesta në Prishtinë.